گھڑوال ؍ چروے دار

گھڑ وال دا کردار وی ٻئے چھوٹے تے سپورٹنگ Supportingکرداراں ریت ہے ۔ بادشاہ ہمیش شکار کیتے گھوڑے تے سوار مِلدے پر کݙاہیں ایں نئیں تھیا جو اوں گھڑ وال کو ںحکم ݙتا ہووے جو گھوڑا تیار کرے۔ قصے دا مزاج اختصار آلا ہوندے تہوں ایہو جیہے منظر نئیں ݙکھائے ویندے جیندی وجہ توں کہاݨی وچ لمبیڑ تھیوے۔

’’قصہ پُھل وزیر دا‘‘ وچ گھڑوال دا مختصر جیہا کردار ہے ۔جہڑے ویلے بادشاہ سپاہیاں کو ںحکم ݙیندے جو پُھل وزیر کوں طبیلے وچ ڈھک ݙیوو تاں اتھاں ہک لِسّا گھوڑا ݙیکھ تے او گھڑوال کنوں پُچھدے جو ایہ بنہاں کنوں لِسّا کیوں ہے تاں گھڑوال ݙسیندے جو بادشاہزادی روز رات کوں اپݨے یار کوں مِلݨ کیتے ایں تیز رفتار گھوڑے تے ویندی ہے ۔ روز دی جھپیڑ کنوں ایہ گھوڑا لِسا تھی ڳئے۔

ایں کہاݨی کنوں انج ٻیا کتھائیں وی گھڑوال دا کردار نشابر یا متحرک کائنی ۔ جے ہے وی سہی تاں اتنا جو گھڑوال گھوڑا پیڑتے شاہی خاندان دے کہیں فرد کوں پیش کریندے تے بس۔

زمانہ قدیم وچ گھوڑا اِی شاہی سواری دے طور تے ورتیا ویندا ہئی ۔ تہوں بادشاہ مال مویشی کیتے انج بھاݨے تے گھوڑیاں کیتے انج طبیلے بݨویندا ہئی تے طبیلے دا سارا نظام انہاں دے حوالے ہوندا ہئی ۔اَتے ٻہوں سیاݨے لوک ہوندن جیڑھے گھوڑیاں دیاں اقسام ، روئیے ، رجحان ،عادتاں ، مرضاں ، تکلیفاں ، علاج اَتے سدھاوݨ دے سارے کم ڄاݨدن ۔ تے انہاں دا وسیب وچ وݙا ناں ہوندا ہئی۔

کݙاہیں کݙاہیں لوک کہاݨیاں وچ شہزادے تے مہم جو ہیرو اپݨے مقصد دی تکمیل سانگے کہیں ٻئے بادشاہ دا چروہے دار یا گھڑوال بݨ تے وقت لنگھیندن۔جیویں جو ہک شہزادے دا کردار چروے دار دی صورت وچ ’’قصہ ڳیا جھر کو ں‘‘دے وچ ݙکھایا ڳئے:

’’جیڑھی شہزادی کوں پرناوݨ ڳئے ودے ہَن او اڳوں ٻیلی بݨائی کھڑی ہئی ۔ او وی کہیں بادشاہی دا شہزادہ ہا ۔ اوندے نال پیار محبت تھیا تے او اوندا چروے دار بݨ ڳیا ۔ او ہُݨ (شہزادہ) اوندے گھوڑیاں دیاں لݙوں کھڑا ملیندے۔‘‘

حوالہ

سرائیکی لوک قصیاں دے کردار، مصنف : شہزاد اسد خان لغاری ، ناشر: جھوک پرنٹرز ملتان