گھاہ

ٻکریاں  چریندے ہاسے ،اپݨے دروں  مال چھڑدا ہا، کلابے توں ، لائن، دھریجہ پھاٹک نہر دی وٹ کھوکھریں  تے کانجویں  دی وستی، اڳوں  جمالی دوست علی شاہ تے پرے پرے تئیں  نکل ویندے ہاسے تے مال سانگے کارویں  گھاہ وی کریندے ہاسے ۔ رڑھیں  دی وَٹ تے دربھ ہوندے ہَن ، سانوک ،تندولا، وسا، جھنجھڑ، کھیرل، کنڈیری ،پوہڑی ،پٹرالا، ٻٹو تے سا ول ہوندی ہئی ۔ کیکریں  توں  لام وی لہیندے ہاسے ۔تے پھلیں  دی مُد کوں  کیکریں  تلوں  سُکیاں  پھلیاں  چُݨدے ہاسے ۔ مال سانگے برسین ،تریا،جنتر، لوسݨ ، جوآر ، ٻاجھری تے ٻے ڈھیر سارے گھاہ ہوندے ہَن ۔ جنہیں  دے ناں  بُھل ڳن ۔رڑھ ءِچ ساڳ وی ہوندے ہَن ۔ جؤساڳ، اَسوں  دا ساڳ ، سریم دا ساڳ،روہی ءِچ پاݨی سُک ویندا ہا تاں  روہیلہ مال وی چرݨ اَمدا ہا۔ہنائیں  کنوں  حال حوال کریندے ہاسے۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان