گِروٹ

ضلع و تحصیل خوشاب دا قدیم قصبہ۔ ریت تے سمندر اِچ پھسیا ہویا خوشاب توں 16 کلو میٹر دے فاصلے تے واقع ہے ۔گِروٹ ݙو الفاظ دامجموعہ ہے۔ ’’گرو‘‘ تے ’’اوٹ‘‘ ۔ یعنی گرو دی اوٹ ۔ قدیم زمانے اچ ایندا ناں کھروٹ وی ملدے۔ اتھاں زیادہ تر ہندو تے سکھ قابض ہن۔ مسلمان گھٹ تعداد اِچ وسدے ہن۔ دیال بھاون اتھوں دے برہمن خاندان دا سردار ہا۔ بالا گروٹ دے نیڑے ایندا ٹھکانہ ہوندا ہا جتھاں تاریخی تہوار بیساکھی دا میلہ لڳدا ہا۔ایں علاقے اِچ آنوݨ آلے پہلے برہمن آکھدے ہن جو اساں گرو دی اوٹ اچ ویندے پیوں۔ گروٹ قصبہ دے نیڑے واسو دے قدیم آثار کھنڈرات دی شکل اچ موجود ہن۔

انگریزی عہد اِچ گروٹ کجھ عرصے کیتے تحصیل صدر مقام وی ریہا۔ ایں دوران اتھاں ڈاکخانہ تے ڈسپنسری قائم تھئی۔ ایں ویلھے اتھاں دی آبادی 25ہزار دے نیڑے ہئی۔ زیادہ تر لوک رَڑھ وہی کریندے ہن تے ملازمت پیشہ ہن۔ اتھاں دے بلوچ تے سید خاندان مشہور ہن۔ بلوچ خاندان دے کیپٹن حیات خاں کو انگریزی دور اِچ جاگیر وی ملی ہئی ۔ محلہ چوڑی گراں، محلہ زرگراں ، محلہ بلوچاں تے محلہ مہاجرین اتھاں دی رہائشی وستیاں ہن جݙاں جومین بازار تجارتی مرکز ہے۔ اتھاں دفتر یونین کونسل ، بنیادی مرکز صحت دفتر، زراعت تے طلبا و طالبات کیتے ہائی سکول وی موجود ہن۔