گُرام کمہار
اسیݙی وستی دا ہک کردار چاچا گُرام کمبھار ہا ۔ گھر تاں کمبھاریں دی وستی ہَس تے رہندا اسیݙی وستی ہا ۔ نانیں جام خاں دی زمین رہیندا ہا ، ناں غلام ہا تے سݙیندے گُرام ہن ۔ رات کوں گھر ولدا ہا تے ݙینھ وَل اَمدا ہا ، چاچے گرام دے بھرا دا ہک واری چک دے چوہدری نال جھیڑا تھی پیا لڑ پے ۔ فیصلہ تھیوے پیا نانیں جام خاں پُچھیا گرام جھیڑے ایلے توں وی کھڑا ہاویں ، چاچے گرام آکھیا جیا سئیں ! وَل تئیں چھڑوایا کیوں ناں ؟ چاچے گرام آکھیا سئیں میں ڳلوں ننگا ہم۔
چاچے گرام دیاں بھولیاں ڳالھیں ڈھیر ءِن ، ہک واری رات کوں پاݨی جھلی ودا ہا ، کہیں سݙ ماریا ، چاچے گرام ولدا پھوٹ پھوٹ ، سر کھا ڳیں ، بھونک وی سہی کیا آکھدیں ؟ نال آکھیُس ، ووئے بے وقوف آ جام خان سݙ ماریے ۔ او جیو جی سئیں جی سئیں …!
ہک واری چاچا گرام سُتھݨ وَٹا آیا ، منہ اندھارے نال ہلیں تے آیا ، کانا ݙینھ دا چڑھ آیا تاں ݙوجھی جوڳ آلے اَدے نصیر پُچھیا اے کیا کر اَئیں ؟ ݙیکھ تے آکھیُس لخ دی ءِس ، ہیں سانگے تاں میں ستھݨ پیندا کینھی۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان