گولڑہ شریف جنکشن ریلوے ٹیشݨ

گولڑہ شریف جنکشن ریلوے ٹیشݨ پاکستان دے دارالحکومت اسلام آباد وچ کراچی–پشاور ریلوے لائن تے واقع ہے۔

تاریخ:

ایہہ ریلوے ٹیشݨ 1882ء وچ برطانوی دور حکومت وچ بݨایا ڳیا ہا۔ ایہہ گولڑہ شریف - ملتان براستہ کندیاں برانچ ریلوے لائن دا جنکشن ہے۔ ایہہ ریلوے ٹیشݨ ریلوے عجائب گھر قائم ہوݨ دی وجہ توں ٻہوں اہم تھی ڳیا ہے۔ برطانوی طرز تعمیر دا شاہکار گولڑہ ریلوے ٹیشݨ تقریباً 140 سال پراݨا ہے۔ راولپنڈی پشاور مین لائن تے واقع گولڑہ ریلوے ٹیشݨ ہک جنکشن ہے جیہڑا ٻہوں سارے شہراں تے مقامات کوں ملویندا ہے۔ صدیاں پراݨے برگد دے درختیں دے سائے وچ وکٹورین طرز دی عمارت ہر اوں بندے کوں متاثر کریندی ہے جینکوں ذوق سلیم دا تھوڑا جیہاں وی ادراک ہووے۔ گولڑہ شریف ریلوے میوزیم، جینکوں پاکستان ریلوے ہیریٹیج میوزیم وی آکھیا ویندا ہے پاکستان دے دارالحکومت اسلام آباد دے سیکٹر E.11 دے بالکل باہاں وچ ہے۔ گولڑہ شریف ریلوے ٹیشݨ پاکستان ریلوے دے راولپنڈی ڈویژن دا حصہ ہے، جیہڑا سطح سمندر توں 1,994 فٹ دی بلندی تے، مارگلہ ہلز دے لماں پوادھ وچ تے گندھارا تہذیب دے گہوارے ٹیکسلا دے قدیم شہر دے پوادھ وچ ہے۔ ایں ریلوے میوزیم وچ برطانوی راج دے زمانے دے ریلوے نال جڑیے آثار تے یادگاراں جمع کیتیاں ڳئیاں ہن۔ اتھاں پہنچ کے انسان 19ویں صدی دے برٹش راج وچ پہنچ ویندا ہے۔ نیروگیج پٹڑی تے چھوٹے کوئلے تے بھاپ نال چلݨ آلے انجن بوڳیاں تے ٹرالیاں کھڑیاں ہن۔ میوزیم وچ مٹی دے تیل نال روشن ہووݨ آلیاں قدیم سگنل لائٹس، بندوقاں، قدیم ریلوے پکھے تے ٻہوں ساریاں چیزاں موجود ہن۔

ریلوے دا عجائب گھر:

ایں ٹیشݨ تے گولڑہ شریف ریلوے عجائب گھر دے ناں نال ریلوے دا ہک عجائب گھر وی موجود ہے۔