گوری دھریجے
دیگی بنگلے آلے گوری اسیݙے سکے ہن ، منڈھ قدیم توں سکاوت چلی اَمدی ءِ، پہلے گوری تے ہُݨ غوری لکھدن ۔ ہیں وستی دے معتبر تے مہاندرے شخص عبدالکریم جیرھے ریلوے ریٹائر ملازم تے پیش امام ہن ، ݙسیندن جو اساں سارے گوری دھریجے دی گوت ہیسے او ݙسیندن جو ایں جاہ دا ناں گوری ہا ، ایں سانگے اتھاں آوݨ آلے دھریجے گوری اَکھیجݨ پئے ڳے ۔ میکوں ڳالھ یاد آئی اے جو خیر پور سندھ دے سردار غلام رسول دھاریجو کجھ سال پہلے اسیݙی وستی آئے ہن تے ݙسیا ہا جو سندھ ءِچ دھریجیں دیاں درجناں گوتاں ہن ۔ اے وی ݙسی ونڄاں جو ارغون نال جنگ دے بعد دھریجہ برادری ٻہوں مشکلاں دا شکار تھئی ، سارے اُجڑ پُڄڑ تے کھنڈ پنڈ ڳئے ، غریبی تے غریب الوطنی دی وجہ توں کجھ لوکیں پیٹ پالݨ سانگے پیشے کیتے ،انہاندی نسبت پیشے دے لیکھے موجب اَکھویجݨ پئے ڳی ۔ ملتان دے دھریجے بلوچ اکھویندے ہن میں ملتان آیاں تاں نکھیڑا تھیوݨ پئے ڳے ۔ او آکھدن اساں بھلئیے ودے ہاسے پر اے بھلیکا پہلے توں اَمدا پے جو کاغذیں ءِچ ڄٹ دھریجہ تے کجھ دھریجہ بلوچ لکھیا اَمدے۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان