گنجیمن برادرز اِن لندن

پاکستان ٹیلی ویژن تے ڳانوݨے آلے پروگرام ݙیکھݨ آلیں کوں یاد ہوسے جو کراچی اِچ رہݨ آلیں ترائے بھیݨیں کئی ݙیہاڑے وݙیاں مشہور تھیاں ہَن ایہ ’’بینجمن سسٹرز‘‘ سݙویندیاں ہَن ایں لیکھے پچھلے الیکشن وچ سیاسی ٹولیں اِچوں گنجیمن برادرز‘‘ دی ٹولی ݙاڈھی مشہور تھئی ہئی اَتے پاکستان پیپلز پارٹی دے جلسیں جلوسیںاِچ گنجے منجے ٹھاہ‘‘ دے نعرے لڳدے ہَن۔

لہوری لوہاریں اِچوں میاں نواز شریف ناں چڑھیے گنجے اِن ‘ آکھدن جو ’’گنجے‘‘ بھاگوند تے بختاور ہوندن ۔ پر ایہ ضروری کائنی اساں کنہائیں ’’گنجیں‘‘ کوں پِنڈاݙٹھے گنجے بھرانویں دی ایہا ٹولی  مطلب اے ۔ گنجیمن برادرز لیکھے بھاڳوند ڳݨیندن جو ’’مارشل لاء‘’ آلے ݙیہاڑیں اِچ پنجاب دے گورنر تے مارشل لاء ایڈمنسٹریٹر جنرل جیلانی ہنائیں دے گنجے ٹوٹݨ تے ہتھ رکھیا تے ہنائیں کوں وَنڑج وپار کنوں سیاست اِچ گھن آیا ۔ جئیں ’’بینجمن سسٹرز‘‘ کوں کراچی ٹی وی دا ہک پروڈیوسر اَڳیتے گھن آیا ہا ۔ جئیں ’’بینجمن سسٹرز‘‘ کوں ڳاوݨ دا پتہ کائناں ہا ۔ ایئیں گنجیمن برادرز کوں سیاست دا علم کائنی ۔ جرنیلیں کوں کنڈ پچھوں ٻہہ تے سیاست کرݨ کیتے ۔ عقلوں پیدل سیاستدان سݙویجݨ آلے ناں دے ’’لیڈر‘‘ لوڑیندے ہِن ۔ جنہائیں کوں اڳوں رکھ تے اُنہائیں اَپݨا کم گھنݨاں ہا ۔ اڳوں رکھیونے تے اَپݨی مرضی موجب کم گھدونے ۔ وَل تھیا اِنویں جو ’’گنجیمن برادرز‘‘ دی نِوڑت ‘ نیاز اَتے وفاداری ݙیکھ کراہیں جرنیل اِنہائیں کوں ٻیا اڳونہاں گھن گے ۔ وزیر خزانہ کنوں وزیر اعلیٰ بݨیے ۔ انہائیں دیاں کیتیاں کرتیاں یا ایئیں آکھ کرتوت ۔ ݙیکھ کراہیں جنرل ضیاء ‘ نواز شریف کوں ’’پُتریلا‘‘ بݨایا اوں ہِک واری آکھیا جو دِل آہدی اے میݙی عمرہ وی نواز شریف کوں مِل وَنڄے‘ ایں وی اَپݨے ’’پتندر‘‘ نال نبھا تے ݙکھائی ۔ محمد خاں جونیجو بہشتی دے خلاف سوئس باس لہندا تے ’’یاسوسیاں‘‘ کریندا رہ ڳیا۔ ایندے ’’پتندر‘‘ دے چوّݨ دے بعد اِی جرنیل ایندی کنڈھ تھپی رہ ڳے ۔

1988ء اِچ پنجاب دا وزیر اعلیٰ تے 1990ء اِچ ملک دا وزیر اعظم بݨوایونے ۔1993ء اِچ ہتھ چا گھدونے تاں ایہ وَنڄ ڈَھٹھے کنڈ دے بھر دڑیں۔ اپوزیشن لیڈر ہووݨ سببوں او ہُݨ وی ٻہوں کجھ اِن ۔ پر کُرسی کھسیجݨ تے اِتی اَرمانی اِن جو چیتا جھاہ تے ننھیں ریہا ۔ اَڄ کلھ حکومت کوں ہٹاوݨ کیتے بھڄ دُھرک دا مُنڈھ ٻدھݨ دی خاطر ’’لندن ‘‘ڳے ہوئے ہن۔چھوٹا بھرا ڈھکیجݨ دے ݙر کنوں پہلے اُتھاہیں ٹِکیا پئے اسیݙا یار مُنشی مُک مُکا اَکھیندے ۔ گنجیمن برادرز لندن اِچ کٹھے اِن ۔ ’’گنجیمن برادرز اِن لندن‘‘۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان