گرنتھ وچ سرائیکی شاعری

سرائیکی شاعری ایں دور وچ اسلام دے علاوہ ݙوجھے مذاہب کوں وی متاثر کریندی پئی ہئی۔ ہندو مت ‘ جین مت دی طرح سکھ مت وی ایں توں متاثر تھئے بغیر نہ رہ سڳیا۔ حضرت بابا فرید مسعود گنج شکرؒ دا کلام گرنتھ وچ محفوظ کیتا ڳیا۔ اینویں حضرت ابراہیم فرید ثانی دا کلام وی گرنتھ دا حصہ ݙسدے۔ اگرچہ سکھ گورو خود سرائیکی نہ ٻولیندے ہن لیکن انھاں دی شاعری تے اوندا فکری مزاج ایں دور دے سرائیکی اسلامی ادب توں متاثر ہئی۔ ’’ادھی گرنتھ‘‘ جیکوں 1604ء ۔ 1603ء وچ پنجویں سکھ گرو ارجن مکمل کیتا۔ ایں ڳالھ دی شہادت ݙیندے ہوئے ڈاکٹر کرسٹوفرشیکل اپݨے ہک مضمون وچ آہدن ’’گرونانک دیاںمذہبی نظماں توں پتہ چلدے کہ انھاں دی شاعری تے سرائیکی اسلوب بے پناہ طاقت دے نال غالب ہئی۔ ایں توں علاوہ گرو ارجن دے اسلوب توں ظاہر تھیندے کہ سولہویں صدی دے آخر وچ سرائیکی شاعری دی بہت زبردست روایت موجود ہئی۔‘‘(38)

چارے کنڈاں ڈھونڈیاں کونہیں میݙا

جے تدھ بھاوے صاحبا تو میں ہوں تیݙا

تربیجھا میں نہیں میکو کیں کریں سلام

ہکو میݙا توں دھنی ساچا مکھ نام

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان