گبھرو (گھوٹ) دے نال پہلی تصویر
خوشی تے غمی وچ فرق میڈے نزدیک صرف اتنا ہے جو خوشی تے اساں نچ پوندے ہاں تے غمی تے رو باہندے ہاں اے ڈوہیں موقعے ساکوں زندگی دا احساس وی ڈِویندن تے ساڈے ہوونڑ دی دلیل وی ہن. ڈوہیں موقعے ساکوں ہک ڈوجھے دے قریب گھن کے آندن تے اساں رل مل کے خوشی وی مَنیندے ہاں تے غمی کوں وی بھوگ ڈیندے ہاں.
ایں ہفتے اساں خوشی مناونڑ ویندے پئے ہاں میڈے بھرا طاہر عباس دی شادی اے. شادی دیاں تیاریاں تاں ہک مہینے توں جاری ہن پر رسماں اج توں شروع تھی گیاں ہن میں اج توں چھٹیاں گھن گھدیاں ہن، ہنڑ بھکر توں واپس میانوالی آپڑیں گھر پہنچاں تاں گھر خالی پیا ہئی پچھنڑ تے پتا چلا ہے جو سارے" مائیاں "دی رسم کرنڑ گئے ودن....... ویسے ساڈے کول تاں گھبرو وی مائیاں باہ ویندئے کوئی کم کار نی کریندا سبالے شودے چِخے تے چڑھے رھندن گھبرو تاں لُگا واش روم تئیں وی نی ویندا.
سبالے توں یاد آیائے" پروفیسر سیف اللہ سیفی "بضد ہَن جو سبالا ظہیر نہ بنڑیں میں آپ بنڑساں انہاں کوں اساں آکھیائے جڈاں چاچا" سُلّو"پنجواں پرنیوا کریسی تڈاں تہاکوں اوندا سبالا بنڑا چُھڑساں فی الحال تہاڈی عمر تھوڑی ہے تھوڑے ہور وڈے تھی ونجوں، مسیں کنجیں بھائی صاحب توں چُوک چُھڑوائی ہے سبالا میکوں بنڑا تاں ڈتا گیائے پر پیساں دا کیا کراں چُوری کھاونڑ وی ونجڑیں ایں، لوہر چڑی تاں اتھے وی ٹھُک ڈینوڑیں پوسی، ساڈی جُتی وی لُکائی ونج سکدی اے ، گاھنا بدھاوی ہوسی، گھڑولی وی بھرنڑ ونجڑیں ایں،گھبرو تے کُڑی دیاں سبالیاں مہندی لاونڑ وی آسن، لالا جاگ وی ہوسی وغیرہ وغیرہ انہاں سارے موقعاں تے پیسے لوڑ پوسن ہنڑ تاں میں سچیندا پیاں جو پروفیسر صاحب کوں ای سبالا بنڑا ڈیندے تاں وارے اچ رہ ونجاں ھا بہرحال گزارا کریسوں. چونکہ میں سبالا ہاں تاں "کھونڈی" دی وی لوڑ تاں پوسی او ساڈے نیڑے تریڑے تاں ہئی کوناں لہذا ڈاڈے آلا کھونڈا پیا ہے اوندے اُتے پُھل پتیاں لوا کے ویلا ٹپیندے ہاں.. اگر کہیں دوست کول کُھونڈی ہووے تاں اپڑاونڑ دا خرچہ میں ڈیساں میکوں کہیں طریقے پہنچا ڈیو تاں بھلا تھیسنے. چونکہ اساں روایتی لوک ہاں تہوں ساڈیاں شادیاں وی روایتی ہوندین جمعرات کوں "چھلا کُوچ" کھیڈا ویندئے جمعے کوں "کھارا" ہوندئے اے تے ترائے ڈینھ "دول شرنا" تے "گُھمراں" ہوندین کل چاچا نورنڑ آپڑیں پارٹی سمیت پہنچ ویسی تے اساں گھمراں کنڑ تاں ہر ویلے تیار ہوندے ہاں، اج ساڈے نانے ہال دول گھدی آندن لہٰذا اج اساں مفت اچ نچڑائیں.
شادی دے موقع تے میں ہک کم اے وی کیتئے جو شعراء کرام لوکاں کو لفظاں نال تاں نچویندے رھندن کیوں نا انہاں کوں باقاعدہ نچوایا ونجیں لہذا جناب سلیم شہزاد، اختر مجاز، نسیم بخاری، مظہر نیازی، صابر بھریوں، صائم جی تے بالخصوص افضل عاجز صاحب کوں ہفتے آلی رات گھمراں تے سڈا گیا ہے تاں جو عوام انہاں دا اے رنگ وی ڈیکھ سکے. اسد خان، مفتی عمران، ندیم بخاری تے ضیاء اللہ قریشی ساڈے شرمیلے دوستاں چوں ہن لہذا انہاں دے بارے سچیندے پئے ہاں جو انہاں نال کیا کیتا ونجیں بکھر توں شاہد بخاری، تنویر فائز، ساجد بخاری تے ظفر شاہ وی گھمراں وچ شریک تھیسن فی الحال تاں انہاں کوں سامعین دا درجہ حاصل اے آ ویسن تاں موقعے تے انہاں نال وی کاروائی ممکن ایں. جہڑے دوستاں تئیں دعوت نئیں پہنچی انہاں کوں وی دعوت ڈتی ویندی اے کیوں جو اے تاں خوشی دیاں ونگاں ہن.
محمدظہیراحمدمہاروی (٢٤ نومبر ٢٠١٦ء)