گانمݨ سچّار

گانمَݨ سَچّار ٻارہویں صدی ہجری وچ نواب غازی خان دی شاہی عُروج تے ہَئ،غازی خان دیرہ غازی خان دا بادشاہ ہا اَتے اسماعیل خان دیرہ اسماعیل خان دی شاہی دا مَالک ھَا.ݙُوہیں مُلخیں دی آپت وچ جنگ رہ وین٘دی ہئ.جھیڑے کُون وَدھاوݨ اَتے دُکھدی کُون تِیلی لاوݨ وَالے ٻہوں سارے چمچے کڑچھے ،خوشامدی برآمدی ہَر دَور وِچ مُوجود ہون٘دن،پَرخوشامتیں دے دربار وچ ہِک شخص اِیجھا وِی ہا جیڑھا ہَر سَچّی گالھ مُنہ تے کر ݙین٘دا ہا،اَپݨی سَچّائ تے سینڑھپ دی وجہ تُوں وزیر دے عُہدے تے پُڄ گیا پر بادشاہ کُوں سَچ آکھݨ تُوں باز نہ آیاـ اُوں شخص دا ناں گانمݨ سچّارـ ذات دا کورائ بلوچ ہا،اصل تعلق جھن٘گ نال ہا،ہِک روایت مُطابق دین پور شریف(خان پور کٹورہ)دے بانی حضرت خلیفہ غلام محمد سئیں وی جھن٘گ وچوں آئے ھَن اَتے گانمݨ سچّار دی سَچّائ دے قِصّے سُݨوین٘دے ہن.آکھیا وین٘دے جو حق سَچ دیاں گالھیں کرݨ تے تُھک جھپ دربارئیں گانمݨ سَچّار کُوں دربار وچوں کݙھوا ݙِتا،اُو اُچ شریف اپݨے پِیراں کول آڳیا تے اِتھاں فوت تِھیا.اُون٘دی قبر دربار جلال الدین بُخاری دے دربار نال اَڄ وی موجود اے،عقیدت مَن٘د گانمݨ سچّار دی قبر دےسَت پھیرے مار تے اُون٘کوں خراج عقیدت پیش کرین٘دن