کݨک
کݨک دی مُد کوں آبھوں کھمدے ہاسے ،رَل تے سٹیں دا تراڑا کریندے ہاسے ،جہڑا سِٹا پکدا ویندا ہئی تلی تے مروڑ تے داݨیں کھمدے ہاسے،کݨکیں پک ویندیاں ہن تاں وݙے ݙاتریاں ݙندوا اَمدے ہن، کاپی تھیندی ہئی، وَلھ دیاں پُولیاں بنڑدیاں ہن، ڳنڈھے ٻدھیندے ہن تے کݨک دے ڈھیر لڳدے ہن، فرشے نال ڳاہ ڳہیندے ہن،ڄٹ نال نال تروپ ݙیندا ہا ، ہُنالے دی تتی دُھپ ء ِچ ݙاندیں دا بُرا حال تھی ویندا ہا،ڳاہ ڳہیجن کنوں پچھے داݨیں کوں چھج لڳدے ہن ، وا گھُلے ہا تاں ٻار وختی اچھری تھی ویندی ہئی نتاں کئی کئی ݙینھ لڳ ویندے ہن،اساں چھوکریں کوں شئے دے داݨے دی تانگھ ہوندی ہئی ،ٻار ونڈیڄݨ ویلے ٻال ایویں کٹھے ہوندے ہن جیویں قربانی دی پھنڈر تے ،غریب عورتاں کلہوٹیاں صاف کریندیاں ہن ،اُکھلی مولہے تیار تھیوݨ پے ویندے ہن،کݨک کپیج ویندی ہئی تاں غریب وݙھ چُنڑدے ہن تے ٻار چوݨ تے غریب کُڈھی کڈھیندے ہن ،ایں پورھیے نال اُو سال دے داݨے بݨا ویندے ہن ،ٻار ونڈݨ آلا داݨے ترکڑی ء ِچ پا تے پہلے بسم اللہ دی برکت اَکھیندا ہا وَلا اُچی اُچی آواز نال ہک آ ،ݙو آ ، ترائے آ اِیویں ڳنڑدا ویندا ہا۔ٻار ءِچوں پیریں فقیریں دا بخرا انج تھیندا ہا،راہک دے داݨے انج تھیندے ہن ،ݙے گھن تے جو بچدا ہا زمیندار گھر چا ویندا ہا ،داݨے دایا گݙیں تے پُڄیندا ہا ،اُونکوں مزدوری مِلدی ہئی، اڄ اے ساریاں شئیں خواب آنگے لڳدن۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان