کے کے اوشا

کے کے اوشا
معلومات شخصیت
ڄمݨ	3 جولا‎ئی 1939ء   ترشور
مرݨ	5 اکتوبر 2020ء (81 سال)  ایرناکولم
شہریت	بھارت برطانوی ہند ڈومنین بھارت (15 اگست 1947–)
عملی زندگی
پیشہ	منصف

کے کے اوشا (۳ جولائی ۱۹۳۹ء توں اکتوبر ۲۰۲۰ء) ہِک بھارتی جج ہن جِنّھاں کیرالہ ہائی کورٹ دے چیف جسٹس دے طور تے خدمات انجام ݙِتّیاں۔ اوہ ہائی کورٹ دی پہلی زنانی جج ہن۔ انہاں زنانیاں دے حقوق اَتے ہر قسم دے امتیازی سلوک دے خاتمے دی وکالت کیتی۔ اوشا نے ایکسائز اینڈ سروس ٹیکس اپیلیٹ ٹریبونل دی صدر دے طور تے وی خدمات انجام ݙِتّیاں۔

زندگی تے رسمی کیریئر

کے کے اوشا ۳ جولائی ۱۹۳۹ء کوں پیدا تھئی۔ اُنہاں ۱۹۶۱ء وِچ بطور وکیل داخلا ڳھدّا۔ انہاں کوں ۱۹۷۹ء وِچ کیرالہ ہائی کورٹ وِچ گورنمنٹ پلیڈر مقرر کیتا ڳیا۔ اوہ ۲۵ فروری ۱۹۹۱ء توں ۳ جولائی ۲۰۰۱ء تئیں ہائی کورٹ وِچ جج اَتے ول چیف جسٹس رہی۔ اوہ ۲۰۰۰ء توں ۲۰۰۱ء تئیں چیف جسٹس رہی۔ اوہ بار توں ہائی کورٹ وِچ شامل تھیوݨ آلی اَتے چیف جسٹس بݨݨ آلی پہلی زنانی ہن۔ ہائی کورٹ توں سبکدوش تھیوݨ دے بعد، ۲۰۰۱ء توں ۲۰۰۴ء تئیں اوہ دہلی وچ قائم کسٹمز، ایکسائز اَتے سروس ٹیکس اپیلیٹ ٹریبونل دی صدر رہی۔

ٻئے کم

۱۹۷۵ء وِچ، اوشا نے جرمنی دے شہر ہم برک وِچ زنانیاں وکلا دی بین الاقوامی فیڈریشن دے بین الاقوامی کنونشن وِچ بھارت دی نمائندگی کیتی۔ اُنہاں زنانیاں دے حوالے نال ہر طرح دے امتیازی سلوک دے خاتمے دے متعلق کنونشن تے اقوام متحدہ دے مشترکہ سیمینار وِچ وی بھارت دی نمائندگی کیتی، جینکوں انٹرنیشنل فیڈریشن آف ویمن لائرز اَتے انٹرنیشنل فیڈریشن آف ویمن آف لیگل کیریئرز نے ترتیب ݙِتا ہئی۔ اوہ یونیورسٹی ویمنز ایسوسی ایشن دی رکن اَتے صدر ہن۔ اوہ "سری نارائن سیوکا سماجم" وِچ شامل ہَن، جیڑھی تروواننتاپورم وِچ ہِک یتیم خانہ اَتے بے سہارا زنانیاں دا گھر ہئی۔

جنوری ۲۰۰۵ء اَتے اکتوبر ۲۰۰۶ء دے درمیان، اوشا نے اڑیسہ وِچ فرقہ وارانہ صورتحال دی تحقیقات دے کیتے انڈین پیپلز ٹریبونل (آئی پی ٹی) دی طرفوں ہِک انکوائری دی سربراہی کیتی۔ سنگھ پریوار دے کارکنوں نے بھوبنیشور وِچ حتمی سماعت وِچ خلل ملیا ۔ ٹریبونل دی ہِک رکن آنگنا پی۔ چیٹرجی نے الزام لایا کہ ہندو قوم پرست کارکنیں نے ٹریبونل دے ارکان کوں عصمت دری کرݨ اَتے سڑکاں تے ننگا کرݨ دی دھمکی ݙِتی۔ اوشا اَتے ٹریبونل دے ساتھی رکن، گجرات ہائی کورٹ دے سابق قائم مقام چیف جسٹس، آر اے مہتا نے اینہہ واقعے کوں "حیران کن، اشتعال انگیز اَتے انتہائی قابل مذمت" قرار ݙِتا۔

دسمبر ۲۰۱۱ء وِچ اوشا منی پور وچ انسانی حقوق دے مسائل تے آئی پی ٹی پینل دی رکن ہن۔ امفال وِچ ٻیٹھے پینل نے پنج سال دے عرصے وِچ ماورائے عدالت قتل اَتے انسانی حقوق دی ٻیاں خلاف ورزیاں دے چالھی توں وَدھ مقدمات دے بارے وِچ گواہی سُݨی۔ انہاں نے ریاست وِچ مسلح افواج (خصوصی اختیارات ایکٹ) کوں منسوخ کرݨ دی سفارش کیتی۔

ذاتی زندگی

اوشا دی شادی وکیل اَتے جج کے۔ سکومارن نال تھئی ہئی اَتے اوہ ملک دے پہلے جج جوڑے ہن۔ انہاں دیاں ݙو دھیریں ہن۔ ۸۱ سال دی عمر وِچ، اوہ دل دا دورہ پوݨ اَتے ہفتے بعد ریڑھ دی ہݙی دی سرجری دے بعد ۵ اکتوبر ۲۰۲۰ء کوں فوت تھی ڳئیں۔