کیرھے اَبّا سَئیں؟

سرائیکی بَولی دی ہِک اَکھاݨ اے جو نک نہ ناساں جُڑ جُڑ ٻہساں ‘ ایہ ہُنائیں بندیں بارے اے جیرھے’’کُجھ‘‘ نہ ہوندیں ہوئیں وی آپݨے آپ کوں ’’سَبھو کُجھ‘‘ ڄاݨدِن اَتے ڄݨواوݨ دی تن وُݨ اِچ لڳے رہندن۔ ایہ لوک اپݨے ورت ورتاوے پاروں ’’بِندرِے‘‘ تے ڳٹھ مُٹھڑے ہوندِن پر اُچیرا ݙسّݨ دی خاطر پَٹکے دَا طُرہ اُچا رَکھدن۔ ٹُردِن تاں کُھری دی جھاہ تے پٻیں اُتے زور ہوندے جو اُچے قد آلیں دے مونڈھے نال مونڈھا رَلا کھڑن۔ اَلیندن تاں اُچا اَلیندن اَپݨیاں صِفتاں آپ کریندِن ’’میں‘‘ اے کیتا ’’مَیں‘‘ او کیتا’’میں‘‘ اے کریندا پیاں ’’میں‘‘ او کریساں‘ ہَر جاہ ‘ ہَر ہمیش‘ ہَر ویلھے ٻکری آلی ’’میں ‘ میں‘‘ لَئی رہندن ۔اَپݨیں کیتیں کرتیں بارے اَزل فضل دے تَلّی واٹویں زٹل رِڑھیندِن ۔ اَپݨے آپ کوں ’’وݙکا‘ وݙیرا‘‘ مَنواوݨ ‘ ڳݨواوݨ اَتے سݙواوݨ کیتے سَئے سَئے کِھتر کریندن۔ پَر ہُنائیں دے سمجھݨ آکھݨ موجب ’’لوک‘‘ بے قدرے اِن انہائیں دی قدر نی کریندے۔

اوݙوں جیرھے ہُنائیں کوں ڄاݨدِن اَتے چنڳیں رِیت سُنڄڑیندن او کِھلدن اَتے ہُنائیں کنوں پَرے پَروبھرے راہندن جو کون اَپݨا چیتا چُڳواوے تے کَن کھواوے؟ کُوڑ سچ آکھݨ ݙسݨ ‘ سُݨاوݨ آلیں دے سِرتے ہِک واری ہِک فلمی اخبار دا رپورٹر لہوراِچ ’’پنجابی فلمیں‘‘ دے ہک مشہور ’’ہیرو‘‘ نال ’’انٹرویو‘‘(اخباری ڳالھ مہاڑ) کرݨ ڳیا ۔ رپورٹر اونکوں اُوندے اَپݨے تے اوندیں کیتئیں کَرتئیں بارے سوال جواب کریندا ریہا۔ ایݙوں اوݙوں دیاں ٻیاں ٻیاں ٻہوں ساریاں ڳالھیں پُچّھݨ ڳچھݨ دے بعد اُوں ہندوستان اَتے پاکستان اِچ بَݨݨ آلیں ’’اُردو‘‘ اَتے ’’پنجابی‘‘ فلمیں دی ڳالھ چولی اَتے پُچھیُس ہاں سئیں ! تُسݙی سوچ سمجھ اَتے اندازے موجب ݙونہیں مُلکیں وچ سبھنائیں کَنُوں وݙا ایکٹر ‘ مطلب اے ہے جو’’وݙا فلمی ہیرو‘‘ کون اے ؟ ڳالھ مُہاڑ پنجابی ٻولی اِچ تھیندی پئی ہئی۔ ایکٹر ولدی پاء جی (وݙے اَدا سئیں) رپورٹر پُچھّیاہندوستان اَتے پاکستان وچ وݙے توں وݙا موسیقار کون ہے؟ ایکٹر آکھیا ’’پاء جی‘‘ رپورٹر وَل سوال کیتا ہندوستان اَتے پاکستان دے ڳانوݨ آلیں اِچوں سبھنائیں کنوں وݙا ڳانوݨ آلا کون ہے؟ ایکٹر ہُوں پہلے آلی دِھر اِچ ولدی ݙتی’’پاء جی‘‘ … اَچھا اے ݙسّو ݙونہائیں مُلکیں وچ فلمیں دا سبھنائیں توں وݙا ڈائریکٹر کون ہے؟ اُوندی وَلدی وَل اِی اُوہا ہئی پاء جی ’’ڳالھ فلمیں‘‘ ایکٹنگ اَتے ڳانوݨ وَڄاوݨ کنوں ’’تھیٹر‘’ تئیں وَنڄ پُنی رَپورٹر پُچھّیا … ہاں سئیں! اے ڈسٖائو پاکستان ‘ ہندوستان وچ ’’تھیٹر‘‘ دے اداکاریں (ایکٹریں) اِچوں وݙا اداکار کون ہے؟ ایکٹر کُجھ کَوڑِیج تے آکھیا یار! پاء جی نیں ہور کون ہو سکدا اے؟ … رپورٹر ہر سوال دے جواب اِچ ایکٹر دی طرفوں ہِکا وَلدی سُݨ سُݨ کراہیں ’’اَختا‘‘تِھیا ٻیٹھا ہَا ۔ اَک نَک تھی تے پُچھدے سُوہݨا سئیں! چھیکڑ اِچ اے ݙسّو چا جو ݙونہائیں مُلکیں وچ وݙے تُوں وݙا بھیݨ دَا … کون ہے؟ ایکٹر نہ سوچیا نہ سمجھیا اچاچیت وَلدی ݙے ٻیٹھا ’’پاء جی‘‘۔

اِیہو جِیہا ہِک بندہ ٻیا اِی ہَا … کہیں لیکھے نہ ہوندئیں ہوئیں وی آپݨے آپ کُوں ’’ہَرلیکھے‘‘ وَݙا ڄݨواوݨ دا شونق اَتے خبط ہَس ۔ ایں ڳالھوں ’’پھوت‘‘ مَارݨ ٹِنڈیر اَتے دَھڄ ٻدھݨ کیتے ‘  ودھا تے ڳالھ کرݨ اَتے دَدڑاں مارݨ دا ہیلکا ہا ۔ کوئی پُچھے ہا ‘سئیں! گھر دا کیا حال اے؟ تاں آکھے ہا کیرھا گھر؟ اسلام آباد آلا ؟ لہور آلا ؟ کراچی آلا ؟ خان پور آلا؟ یا گِدڑ آلے آلا؟ کوئی پُچھے ہا سئیں ! اَسیڈی بَھرڄائی تاں خیر سلا نال اے ناں؟ … آکھے ہا کیرھی ٻھڄائی؟ لہور آلی؟ کہروڑ پکے آلی؟ حمایتیں آلی؟ یا دَان خانی؟ کوئی پُچھے ہا سئیں! وَݨج وَپار اَتے کم کار دا کیا حال اے؟ تاں آکھے ہا کیرھے وپار بارے پُچھّے وِے ؟ مَنڈی دی آڑھت ؟ گُڑ کھنڈیا کپاہ دَا؟

اینویں ہک واری اُوندے سنگتیں اِچوں ہک سنگتی پُچھیّااَدّا ! تیݙے اَبّے سئیں دا کیا حال اے؟ ڳالھ وَدھا تے کرݨ اَتے دَراڑاں مارݨ دا ہیلکا تاں ہا ۔ وَلدی ݙیندیں ہوئیں کیرھے اَبا سئیں……؟

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان