کیرھے اَبّا سئیں؟

کُوڑ سچ آکھݨ ‘ ݙسݨ اَتے سُݨاوݨ آلے دے سِر تے اَکھیندِن جو ہک واری ہک اخبار دا رپورٹر ’’لہور‘‘ اِچ پنجابی فلمیں دے ہک مشہور ایکٹر نال اخباری ڳالھ مہاڑ کرݨ کیتے ڳیا ۔ اُردو ‘ پنجابی ‘ پاکستانی ‘ ہندوستانی‘ فلمیں بارے سوال جواب کریندیں ہوئیں اُوں اخبار آلے ہوں ایکٹر کنوں پُچھیا جو اُوندے رایے موجب ہندوستان تے پاکستان اِچ سبھنائیں کنوں وَݙا ایکٹر مطلب اے۔

ہیرو کون ایں؟ِایکٹر وَلدی ݙتی ۔ پا ء جی(وݙے اَدا سئیں) اخبار آلے پُچھیا جو ہندوستان تے پاکستان اِچ سبھنائیں کنوں وَݙا موسیقار کون ایں؟ اُوں وَلدی ݙتی ’’پاء جی‘‘اخبار آلے وَل پُچھیا ۔ جو ہندوستان تے پاکستان اِچ سبھنائیں کنوں وَݙا ڳاوَݨ آلا کون اے؟ اُوں آکھیا اَپݨے ’’پاء جی‘‘۔

اخبار آلے پُچھیا! جو ہندوستان تے پاکستان اِچ فلمیں دا سبھنائیں کنوں وݙا ڈائریکٹر کون ایں؟

ایکٹر ولدی ݙتی ’’پاء جی‘‘۔

اخبار آلے پُچھیا جو ہندوستان تے پاکستان اِچ تھیٹر دا وݙا’’اداکار‘‘ کون ایں؟ اُوں آکھیا یار ’’پاء جی‘‘ ہِن ۔ ٻیا وَت کون اِیں۔ چھیکڑ اِچ اخبار آلے اَک نکّ اَتے اَختا تھی تے پُچھیا ‘ ہندوستان تے پاکستان اِچ سبھنائیں کنوں وݙا وݙے کنوں وَݙا بھیݨ دا…… کون ایں؟ ایکٹر دے مونہہ اِچوں نِکتا ۔ اپݨے پاء جی تے ہور کوݨ ہو سڳدا اے؟۔

اینویں اَکھیندن جو ہک دراڑی یا تلی واٹویں رِڑھیندا ہا تے وݙیاں وَݙیاں دراڑاں مریندا ہا‘ کوئی پُچھے ہا‘ گھر ٻار دا کیا حال اے؟ تاں آکھے ہا کیرھا گھر ؟ لہور ‘ آلا ؟ اسلام آبادآلا ‘ کراچی آلا ‘‘ یا گِدڑ آلے آلا؟۔ کوئی پُچھے ہا سئیں! اسیݙی بھڄائی تاںخیر سلا نال اے نا؟ تاں او آکھے تُسیݙی کیرھی بھڄائی؟ لہور آلی‘ کہروڑ پکے آلی‘حمائتیں آلی؟ یا اپݨی دان خانی؟ کہیں پُچھیا حال سُݨائو سئیں ! مِل کیئیں چلدی پئی اے؟ اُوں آکھیا کیرھی مِل ؟ ڳنّے آلی مِل ؟ یا سٹیل مِل؟اینویں کہیں بندے اوں کنوں پُچھیا چا ۔ ہاں سئیں !تُسیݙے اَبّے سئیں دا کیا حال اے؟؟ دراڑاں مَارݨ دا تاں ہیلکا ہا‘ کُھتی کھن کراہیں پُچھدے کیرھے اَباّا سئیں؟ اسلام آباد آلے لہور آلے؟ کراچی آلے ‘ رحیم یار خان آلے ‘ یا دُپھلی بسیر خان والے؟

ایہو لیکھا پنجاب دے وݙے وزیر غلام حیدر وائیں ہوریں دا اے ‘ آکھیا ہینے جو مسلم لیگی میݙے سݙے تے کن رکھن اَتے سنبھر تے رَہن ‘ وائیں ہوریں اونویں تاں مسلم لیگی سݙواوݨ آلے وانگے وݙے سیاݨے اِن ‘ پَر اپݨے آپ کوں سݙویندے درویشن وزیر اعلیٰ اِن ۔ اسیݙے یارمُنشی مُک مُکا دے آکھݨ موجب تِکھے تے کپنتر ہوندیں ہوئیں وی اُنہائیں ایہا ڳالھ درویشیں آلی کیتی اے ‘ ہُݨ سوچݨ سمجھݨ تے پُچھݨ ݙسݨ آلی ڳالھ ایہ ہے جو کیرھے مسلم لیگیں کوں سݙا ݙیسن؟ کُرسی کوں لوݙا تاں آوݨ ݙیو‘ اَڄ کلھ دے حاکمیں دے آسے پاسے تے اڳوں پِچھوں رہ تے مسلم لیگی سݙواوݨ آلیں اِچوں کہیں ہک اِی نی لبھݨاں ۔ ایہ وی تاں وائیں آنگے مسلم لیگی اِن جیرھا قائد اعظم دی بھیݨ مادرِ مِلت محترمہ فاطمہ کوں کنڈ ݙے تے ایوب خان دا کنونشن لیگی ورکر ونڄ بݨیا ہا۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان