کھکھہ راجپوت

کھکھہ راجپوت کشمیر، پاکستان تے بھارت وچ وسݨ والا ہک معزز قبیلہ اے۔ اے قبیلہ اپݨی عظیم تاریخی روایات دا حامل اے اتے اپݨے موروث اعلیٰ دے ناں دی مناسبت نال کھکھہ راجپوت سݙویندے۔ کھکھہ راجپوت قبیلہ انتہائی جنگجو، بہادر اتے غیرت مند قبیلہ اے۔ ایں قبیلے دے لوک انتہائی مہمان نواز ہوندن اتے اپݨے خاندان توں باہر رشتہ داری نی کریندے۔ کھکھہ راجپوت اعلیٰ اوصاف اتے اقدار دے حامل لوک ہن۔ مظفر آباد آزاد کشمیر کوں انہاں لوکاں دا مرکز سمجھیا ویندے۔

کھکھہ خاندان جنجوعہ راجپوت توں پیدا تھیا، جیندے آباء اجداد مہا بھارت دے پانڈو خاندان توں ہن۔ ایں خاندان دے جد امجد دا ناں مہاراجہ جنمے جایا ہئی۔ جنمے جایا دا شجرہ ارجن نال ونڄ ملدے۔ راجا جنمے جایا دے خاندان توں رائے دھروپت دیو پیدا تھیا اتے اوں دا ہک پتر ہئی جیندا ناں رائے اجمل جنجوعہ ہئی۔

رائے اجمل اپݨی جوانی وچ ٻارہویں صدی عیسوی وچ شہاب الدین غوری توں متاثر تھی تے اسلام قبول کیتا اتے اپݨا ناں رائے دی جاہ راجا نال تبدیل کر ݙتا۔ راجا اجمل دی اولاد وچوں رائے مل یا راجا مل خان پیدا تھیا، جئیں کوہستان نمک دی کان توں باقاعدہ تجارت شروع کیتی۔

راجا مل خان دے پنج پتر ہن، جنہاں وچ راجا تنولی، راجا جودھ، راجا کھکھہ، راجا بھیر اتے راجا کالا خان پیدا تھئے۔ مظفر آباد دا مشہور حلقہ کھاوڑہ راجا کھکھہ خان دے ناں نال منسوب اے، جیہڑا کھکھے واڑہ کھاوڑہ تھیا۔ کشمیر تے راجپوتاں دے دور حکومت وچ ایں علاقے کوں خود مختاری حاصل رہی۔ راجا کھکھہ خان دی اولاد نے بالترتیب امب (موجودہ خیبر پختونخوا)، جہلم، نیلم (آزاد کشمیر)، چکوال اتے کہوٹہ وچ سکونت اختیار کیتی۔ بعد وچ انہاں وچوں کجھ اپݨی اولاد اتے ساتھیاں دے اثر و رسوخ نال اپݨی اجارہ داری قائم کرݨ وچ کامیاب تھئے۔