کھڑی ݙیندی ہاں
ایہ سرائیکی دا ہک ڳاوݨ ہے۔ ایہ ریاست بہاول پور دی فوج دا سرکاری ترانہ ہائی۔ پہلی جنگ عظیم وچ نواب صاحب نے آپݨی ملوک فوج انگریزاں کیتے محاذ تے بھیڄی تاں بہاول پور دی فوج دے ٻہوں سارے فوجی شہید تے بیمار تھی ڳئے۔ حالت جنگ برداشت نہ کر سڳے۔ اوں دستے کوں خراج تحسین پیش کرݨ کیتے ایہ گیت لکھا ڳیا تے بہاول پور دی فوج دی دھن تے طور تے سرکاری سرپرستی وچ ڳایا ویندا ریہا۔ فوج پاکستان وچ شامل تھی ڳئی، وت ٻہوں عرصہ بعد وچ بہاول پور وچ فوج دی کور بݨی۔
کھڑی ݙیندی ہاں
[لکھو | ماخذ وچ تبدیلی کرو]کھڑی ݙیندی ہاں سنیہڑا اِنہاں لوکاں کُوں
اللہ آن وساوے ساݙیاں جھوکاں کُوں
پِیر پیغمبرا، سلطان سکندرا
میں مَر ڳئی، میں مَر ڳئی
ہائے ترس نی آندا اِنہاں لوکاں کُوں
اللہ آن وساوے ساݙیاں جھوکاں کُوں
کُونجاں وانڳوں وَیݨ وَلاواں
اللہ ہُݨ میݙا، اللہ ہُݨ میݙا
ہائے کیا میں ݙَساں اِنہاں لوکاں کُوں
اللہ آن وساوے ساݙیاں جھوکاں کُوں
کِینکوں جانی ݙُکھ سُݨاواں
کوئی نئیں میݙا، کوئی نئیں میݙا
ہُݨ کِینویں ݙیواں دھان٘ہ اِنہاں لوکاں کُوں
اللہ آن وساوے ساݙیاں جھوکاں کُوں