ککردے پُھل

سید نصیر شاہ دی کتاب ’’ککر دے پُھل‘‘دی پہلی اشاعت پنجابی ادبی باورڈ توں 1987ء وچ تھئی ۔ سید نصیر شاہ دا تعلق میانوالی دے دینی تے ادبی گھراݨے نال ہئی ۔ 1954ء وچ اُنہاں دیاں وݙیاں کتاباں ’’مجموعہ تفاسیر ابومُسلم‘‘ تے ’’موسیقی کی شرعی حیثیت‘‘ ادارہ ثقافت اسلامیہ توں چھیاں۔ 1958ء وچ میانوالی توں مذہبی تے ادبی مضامین دا حامل رسالہ ’’سوز و ساز‘‘ تے بعد وچ ’’شعاع مہر‘‘ جاری کریندے ریہے ، اَتے ’’طلوع اسلام‘‘ وچ مضمون نگاری کیتی ۔ مصر دے ہک رسالے ’’الاسلام‘‘ سید نصیر شاہ کو ں’’عربی دا ادیب‘‘ تسلیم کیتے ۔ اپݨے علم ، فن تے صلاحیتاں توں بے نیاز نصیر شاہ تے اے افسانے دوستاں تے عزیزاں دی فرمائش تے لکھین ۔

’’ککرے دے پُھل‘‘ دے بیک پیپر تے ظہور دھریجہ لکھدن:

’’سرائیکی وسیب دی مردم خیز دھرتی میانوالی کوں شعر و نغمے دی سر زمین آکھیا ویندے ، اے سچ ہے جو اتھاں شعر و شاعری ٻہوں تھئی اے پر گلوکاروی وݙے وݙے پیدا تھن، نثر گھٹ لکھی ڳئی اے ۔ میانوالی توں نثر دا معتبر حوالہ ’’ککر دے پُھل‘‘ دے شائع تھیوݨ نال سامݨے آئے ۔’’ککر دے پُھل‘‘ دے خالق کوں میں ہک شخص نی بلکہ ٻہوں وݙی ہستی دا ناں ݙینداں تے اوں ہستی دا ناں سید نصیر شاہ ہے۔‘‘

حوالہ

ظہور احمد دھریجہ دی سرائیکی ادبی خدمات دا جائزہ (مقالہ نگار: شائستہ ظہور،بہاء الدین زکریا یونیورسٹی ملتان)  نگران مقالہ: ڈاکٹر محمد ممتاز خان کلیانی