کڑوا سچ

کٌوڑ دے مونہہ دٌھوڑ ن لیگ دی حکومت ہائی، پنجاب سمیت مقبوضہ سرائیکستان وچ شوبازشریف داسکہ چلدا ہا۔۔۔ہک ݙینہہ سنگتی خلیل فون کیتا جوسردارپرویزگورچانی داڄل دے وسنیکیں تے قہروسائی پئے، پولیس داڄل شہرکوں گھیراپاتاہویا اے گھریں دے در بھن کے پولیس لوکیں کوں چیندی پائی اے تریمتیں کوں وی نئیں چھوڑیندے پئے، الہ دا ناں منو میڈیا اٌتے ایں ایشو کوں نشابر کرکے ہینڑے داڄلیاں دے بانہہ بیل بنڑو! اونکوں آکھیا یار میں تاں اخبارداصحافی آں میݙے اخبار وچ ڈپٹی سپیکرپنجاب دے پیودے خلاف خبر چھپ وی ڳئی تاں کئی اثر کائناتھیسی، اینویں کر تیکوں سینئر صحافی رئوف کلاسرادا موبائل نمبر گھلینداں مہربانی کریں میݙا نہ ڈساویں جونمبرکیں ݙتے، اونکوں سارا حال ݙیویں الہ کریسی ایں ایشو تے پروگرام کرچھوڑیسی، میں وی اونکوں آکھساں۔ اوݙوں میں رؤف کلاسرا سئیں کوں واٹس ایپ سنیہاگھلیا جو داڄل دے لوک قہرہیٹھ آئے پن مظلوماں دی مدد کریسو تاں تھورائت ہوساں۔ ول سنگتی خلیل اتے داڄل دے کجھ بئے لوکاں رؤف کلاسرا نال رابطہ کرے اونکوں ساراحال ݙتا، وڈیوکلپ، آڈیوریکارڈنگ، فوٹو، مقامی اخباراں وچ چھپݨ آلیاں خبراں دے ٹوٹے واٹس ایپ تے گھلیے۔ رؤف کلاسرا آپڑیں پروگرام وچ سمورا ہفتہ داڄل وچ پولیس گردی تے سردارپرویزگورچانی دے ظلم کوں نشابر کیتی رکھیا جیندے بدلے وچ ڈی پی او راڄن پور رؤف کلاسرا دے خلاف شرپسندی دیاں دفعات لاکے ایف آئی آر کٹواݙتی، آئی جی پنجاب وی فون کرکے دھمکیاں ݙتیاں پر دھرتی دا حلالی پٌتر ڈٹا ریہا, ول نتیجہ اے نکھتاجو پولیس ایف آئی آراں ڈسچارج کرکے گرفتار ݙواڈھائی سو بندے چھوڑݙتے، داڄل دے لوکاں میکوں تے کلاسراسئیں کوں فون کرکے شکریہ ادا کیتا۔ ایندے ہفتہ پچھوں دی ڳالھ ہوسی میں پارلیمنٹ وچ قومی اسمبلی دی پبلک اکائونٹس کمیٹی دے اجلاس وچ ڳیومی تاں رؤف کلاسرا سئیں وی اتھاں بیٹھے ہن، میں پروبھرا سلام کرکے بہہ ڳیومی, کلاسراسئیں چٹ گھلی جو میکوں مل کے ونڄیں۔۔۔۔۔میکوں بھئوپئے ڳیا جو گودا کاوڑیا بیٹھے، آدھل اجلاس وچ فون آیا تاں کمیٹی روم وچوں باہر نکل کے کال سٌنڑݨ دے بہانے پٌھتکن لڳیم تاں پچھوں کئو آئی راݨا صب کنتے ویندے پیو ہک منٹ ڳالھ تاں سٌنڑو, میکوں پک تھی ڳیاجو وݙا بھرا چھوٹے بھرا کوں صیب اوں ویلھے سݙیندے جݙاں گٌک مٌک تھیاودا ہووے، کئی واہ نہ ہئی پچھوں تے ولنڑا پئے ڳیا نیڑے تھی کے آکھیم اڄ پی اے سی دے اجلاس وچ وݙیاں اہم خبراں ملین اڄ تاں سارا پروگرام ایندے اٌتے کریسو۔۔۔۔۔پی اے سی اجلاس کوں مارو گولی پہلوں اے ݙساجو میݙاموبائل نمبر خریت دے بھت وانگو کیوں ودا ونڈیندائیں؟ میکوں ساری 0الھ انڳبں لڳی آکھیم سئیں جیکر تہاݙاموبائل نمبرنہ ݙینداتاں تہاکوں اے تلادعائیں کیویں ڈھہیندیاں بھلا! ول میں کلٹی ماری، بھائی جان! بکھ وݙی لڳی اے بھرجائی لنچ بکس انیندی اے؟۔۔۔کلاسراسئیں کھل پئے تے آکھیس اوندا مرݨا وی میکوں کرݨاپوندے، میں آکھیا ہݨ ٹکر چھوٹا بھرا کھویسی یاوݙابھرا۔۔۔ول اساں پارلیمنٹ دے کیفیٹیریالڳے ڳیوسے ہک ݙو بئے سنگتی وی نال تھی پئے تے کلاسرا سئیں دا کھیسہ ہولا کیتوسے۔۔۔۔ول اونکوں او بھنڳیا جو کیہڑی گالھ تے کاوڑیا ودا ہئی۔ پنج چھی سال پچھونہی ڳالھ اے غضنفرعباس بی بی سی وچ ہوندا ہائی،او میں تے صفدر کلاسرا رل کے اسلام آباد وچ کم کرݨ والے سرائیکی صحافیاں دا پلیٹ فارم ٹھہاوݨ دی کوشش ودے کریندے ہاسے، اٌتوں نذربلوچ سئیں داورہیݨہ آڳیا اساں انہاں دا تعزیتی ریفرنس کراوݨ دی مِتھی۔۔۔۔پر، ننیشنل پریس کلب تے اوں ویلھے ہک شاونسٹ پنجابی گروپ قابض ہا جئیں ساکوں تعزیتی ریفرنس نہ کرݨ ݙتا بھل جو ڈوچار جعلی لوکاں کوں رلاکے خود ہک ڈمی ریفرنس کرایا جیندے وچ کٌل یارھاں بندے بیٹھے ہن، ول اساں پریس کلب انتظامیہ کوں ݙسائے بنا پریس کلب دے لان دی چٌنڈھ وچ مظہرسعیدگوپانگ نال شام منائی تاں نیشنل پریس کلب دا فنانس سیکرٹری وقارستی صفدرکلاسرادے بکے پئے ڳیا، صدر پریس کلب شہریار میکوں دھمکی ݙتی جوتساں لسانیت کھنڈاوݨ توں باز نہ آیووے تاں تساں ترائے بندیں دی ممبرشپ مٌنڄ کرکے پریس کلب وچ داخلہ بندکرݙیسوں۔۔۔۔اٌتوں اساں رفعت عباس سئیں دے نال شام مِتھی کھڑے ہاسے، ترِکڑے دی میٹنگ وچ میں تجویزݙتی جو رفعت عباس سئیں دے نال شام وچ رؤف کلاسرا کوں دعوت ضرور ݙویجے، صفدر آکھیااومصروف ہوندے کتھاں آندے، میں آکھیایار اونکوں ترلہ تاں کروں نتاں کئی بیاراہ ڳولیسوں، ترِکڑے دی امنا پا کے بیٹھیں بیٹھیں میں آپڑیں موبائل توں کال ملائی تاں سٌنڑیج پئی ول رئوف کلاسراسئیں پروگرام وچ شرکت دی امنا کرچھوڑی۔ اساں پریس کلب انتظامیہ توں لڑبھڑ کے رفعت عباس سئیں نال شام سانگے ݙوڑی فیس ݙے کے ہال گھدا تے پروگرام تھی گیا، ویندے ویلھے میں رؤف کلاسرا دے کن وچ کٌھس پٌھس کیتی جو پریس کلب وچ ساݙے نال وانج پیا تھیندے، انہاں پچھا کون اے؟ میں آکھیافنانس سیکرٹری وقارستی ساݙے پچھوں لڳاودے۔۔۔۔۔اوں ویلھے رئوف کلاسراسئیں 92نیوز(چینل) وچ ڈائریکٹرنیوزہن تے آپڑاں پروگرام وی کریندے ہن تے نیشنل پریس کلب دا فنانس سیکرٹری وقارستی 92نیوز(چینل) دا رپورٹر ہائی۔۔۔۔۔۔۔۔۔تریجھا ݙینہہ ہوسی میں پریس کلب بیٹھی ہمی تاں وقارستی ہوکداسہکدا آیاتے بانہہ کنوں پکڑکے کلہا گھن ڳیا، آکھیوس میں کݙاں تہاݙے خلاف آں تساں اے تلا اٌتے میݙی شکایت کیتی ہیوے میں تاں تیݙا بھرا ہاں۔ کجھ ݙینہاں پچھوں 92نیوز(چینل) دے ہک بئے رپورٹر سنگتی میکوں ݙسایا جو رؤف کلاسرا نے وقارستی دی گت بنڑائی اے، اونکوں سݙ کے آکھیوس اوئے حرامی آں پریس کلب دا فنانس سیکرٹری بݨ کے توں وݙا جوان نیوھی بݨ ڳیا، او میݙے چھوٹے بھرا اِن جیکر تئیں پریس کلب وچ اٌنہاں دا داخلہ بندکیتا تاں میں چینل وچ تیݙا داخلہ بند کرݙیساں۔۔۔۔اوݙینہہ تے اڄ دا ݙینہہ ساکوں پریس کلب وچ کہیں کوں ووئے آکھݨ دی جرات نہ تھئی!! ایں کن پہلے دی ڳالھ اے میکوں کہیں صحافی سنگتی پچھا، تیں روزنامہ دنیا وچ اپلاہی کیوں نئیں کیتا؟ اوں ویلھے دنیا اخبار کوں اسلام آبادوچوں مٌنڈھ بدھیاں تھولے ڄہاڑے تھئے ہن تے میکوں اے خبر ہائی پئی جو رؤف کلاسرا اسلام آباد وچ روزنامہ دنیا دا ریذیڈنٹ ایڈیٹر اِے۔ میں اوں سنگتی کوں ولدا ݙتا، نئیں یار میں اپلائی نئیں کیتا میں جتھاں ہاں اٌتھائیں ٹھیک آں۔۔۔۔۔اوں آکھیا یار توں وی پاڳل ایں، رؤف کلاسرا دنیا اخبار دا ریذیڈنٹ ایڈیٹر اےتے او سرائیکیں کوں سݙسݙکے ݙوڑی چوڑی تنخواہ تے رکھیندا بیٹھے۔۔۔۔میں آکھیا یار میکوں تاں نیسی سݙیا، جیکر سݙے ہا تاں میں وی سوچاں ہا, بھلا گھیو سٹئیں سر سڑدے! ول ݙو مہینے بعد وونت ملی جو رؤف کلاسرا سئیں کوں دنیااخباروچوں ریذیڈنٹ ایڈیٹردے عہدے توں ہٹاݙتاڳئے، پنجابی مافیا نے گروپ ایڈیٹر روزنامہ دنیانذیر ناجی کوں شکائت گھلی جو ”اسلام آباد وچ رؤف کلاسرے انھی پا چھڈی اے، سارے نااہل سرائیکیاں نوں وڈیاں وڈیاں تنخواواں تے بھرچھڈیا اے“۔ میکوں اے سٌݨ دلوں ݙکھ تھیا جو ݙیکھو یار ”سارے سڄݨ سماندے وچ اکھیاں دے کٹرنہ ماوے“۔ ول رؤف کلاسرا دے ہٹݨ پچھوں ڈھگ سارے سرائیکی صحافیاں کوں روزنامہ دنیا وچوں کڈھ ݙتا ڳیا۔۔۔۔۔شئیت اے ڳالھ رؤف کلاسرا دے دل وچ لکیج ڳئی، تہوں جݙاں وی اساں انہاں کوں آپڑیں اجلاساں وچ سݙیا انہاں دا آکھنڑ ہونداہا جوسرائیکی صحافیاں دی تنظیم نہ بݨاؤ تہاݙے سانگے نوکری اوکھی تھی ویسی۔ پر سیالے دی ڳالھ اے، ہک ݙینہہ پراݨے سنگتی راشدعزیزبٌھٹے دافون آیا، آکھیٌس! رؤف کلاسرا دا موبائل نمبرتاں گھل ݙے چولستان وچ ݙاݙھاظلم تھینداپئے، طارق بشیر چیمے ظلہل دی انت کر چھوڑی اے، ہیڈرازقاں دے نیڑے سمیجیاں دے سو گھرٹریکٹر چلاکے سٹ ڈتے نے ماریا کٌٹیاوی ہینے تے اٌلٹا انہائیں دے خلاف پرچا کٹوا ݙتس، رؤف کلاسرا دا نمبروی ڈیوو تے اونکوں آکھو وی سہی جو مظلومیں دا امدادی تھیوے۔۔۔۔۔میں وی عادات توں مجبور آں، بھٹہ سئیں کوں آکھیا جو حکم دی تعمیل تھیسی۔۔۔۔اوں ویلھے نمبر وی گھل ݙتا تے رئوف کلاسراسئییں واٹس ایپ سنیہاوی گھلیا جو طارق بشیرچیمہ چولستانیاں کوں جیوݨ نئیں پیاݙیندا۔۔۔۔!! (جاری) لکھت: راݨاابرارخالد