کوڑیسن نہ تاں ٻیا ٹھرسِن

ہا سئیں! تاں کلھ ڳالھ تھیندی پئی ہئی اَپݨے سرائیکی لیڈریں دی جو ہنائیں جݙاں دی ’’سرائیکی‘‘ سرائیکیں اَتے سرائیکی وسیب دے حق حقوق دے ناں تے سیاست کرݨ دا مُنڈھ ٻدھے بھڑبھٹے دے والیں آنگے ہِکی جھاہ تے کھڑن ‘ مجال اے جو ہک سُتر وَدھیے ہووِن ‘ ہک صلاح ‘ ہک مُٹھ تھی تے مونڈھے نال مونڈھا رَلا ہک ݙوجھے دے ٻانہہ ٻیلی تھیون ہا ‘ سرائیکی وَسیب دی وستی وستی ‘ گھر گھر وَنڄن ہا ‘ وسیب اِچ وَسݨ آلیں گھر دے سبھنائیں بھاتیں کوں اَپݨی ڳالھ ݙساوِن ہا‘ ہک ہک کوں اَپݨے نال ٹُرݨ تے راضی کرِن ہا ‘ پر تھیا اونویں ہے جو ایہ آپ کٹھے نی تھی سڳیے ‘ آپ نِکھڑ کھڑن ۔ لوکیں کوں کانو کان کر آپو اَپݨی لیڈری پکی کر ٻیٹھن ‘ سئیں تاج لنگاہ صاحب ہووِن ‘ سئیں حمید اصغر شاہین ہوریں ہوون ‘ سئیں عبدالمجید کانجو صیب ہووِن یا سیٹھ عبیدالرحمن صیب ہووِن ‘ آپت اِچ ٹھر نی کھمدے ‘ ہر کوئی اَپݨا اَپݨا کُکُڑ کچھ اِچ پئی وَدّے ۔ ہر ہک اَپݨی اپݨی جھاہ تے ’’لیڈر‘‘ اے ۔ ݙوجھے کہیں کوں ’’لیڈر‘‘ مَنݨ کیتے تیار کائنی ۔ ایں ڳالھوں بیگانے اَپݨے آپ ہنائیں کوں نی منیندے ‘ لوکیں نال ڳانڈھا نہ ہووݨ سببوں ایہے سبھے لوکیں کنوں ݙردِن ‘ الیکشن اِچ نی کھڑدے‘ جیرھے کھڑدِن او ووٹیں دی پنبیڑ پی کھڑدِن‘ اُونویں عوام کنے لنگھ نہ وَنڄن ووٹ گھنݨ کیتے بھڄ پَوِن تاں ایہو کجھاِی تھیوݨے۔

اسیݙے ایس کیو ایم آلے بھرا سردے کراڑے اِن ۔ یا ایئیں آکھ ٻنہائیں آنگے ’’شرمُوں‘‘ کائنی۔ ݙوں چار چھوہر چِھٹکر گھن تے اِی سڑکیں تے نِکل پَمدن ‘اَپݨے لیکھے تاں او جلوس کڈھیندِن پر تھیندا اینویں ہے جو اَپݨے ہتھیں اَپݨا جلوس آپ کڈھوا کھڑدِن۔

ٻی سوچݨ سمجھݨ تے پُچھݨ ݙسݨ آلی ڳالھ ایہ ہے جو ہُݨ پی پی دی حکومت بݨݨ دے بعد اَپݨے ہنائیں مارکے کوں ایہ ’’شونق‘‘ کیوں چاتے ‘ جݙاں پی پی پی دی حکومت طرفوں نشتر پُل واسطے رَکھے ہوئی 77کروڑ روپے دی رقم شربر تھئی ہئی۔ مسلم لیگ دی حکومت کیتی ہئی ‘ ہُنائیں ڄیہاڑے ایہ کتھاں ہَن ؟ جݙاں خواجہ فرید سئیں دی اولاد اِچوں خواجہ محمداصغرکوریجہ سئیں کنے پنجاب اوقاف دا محکمہ ہا ‘ ہنائیں ایں بارے کیا ڈھال بھنوائی ہئی تے ’’ہنائیں‘‘ ہنائیں کنوں کیا پُچھ ڳچھ کیتی ہئی؟ شیت جنرل ضیاء اَتے اوندے ٻالکیں دی حکومت پی پی پی کنوں وَدھ تے ’’سرائیکی‘‘ سرائیکیں اَتے سرائیکی وسیب دی سنبھال لدھی ہوسے؟ ایں ڳالھوں پی پی پی تے ہنائیں دی کاوڑ ڈھری نی پی تھیندی‘ اسیݙا یار مُنشی مُک مُکا وَت ٻی ڳالھ کریندے اوندے آکھݨ موجب پی پی پی سرائیکی وسیب دا نویکلا تے انج ’’کلچرل ونگ‘‘ بݨا تے ‘ ٹی وی تے ’’سرائیکی‘‘ کیتے ٹائم ݙے تے ‘ اکادمی ادبیات دے مقابلیں وچ سرائیکی کوں شامل کرتے اَتے آدم شماری آلے فارم اِچ سرائیکی دا خانہ رکھ تے اسیݙے سرائیکی لیڈریں دے مونہہ اِچوں ٻہوں سارے نعرے کھس گھدن‘ ایہ اِی بھلا کوئی سڄݨیپا اے؟ پی پی پی تے کوڑیسن نہ تاں ٻیا ٹھرسِن؟۔

ٻدھ 21؍ستمبر1994ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان