کوٹلے دیاں یاداں

مہر حامد علی شاکر سیال دی پیدائش کوٹلہ دیوان اچ تھئی ۔ میں نکا ہم میݙے ابا سئیں اللہ کوں پیارے تھی ڳئے ۔ میکوں اپݨے ابا سئیں دی شکل یاد کینھی ۔ میکوں میݙے ماماں سئیں میاں احمد بخش صاحب پالیا ۔ نکے لا میݙے تعلیم شروع تھئی ، کوٹلے دیوان اچ پرائمری سکول ہا ،میݙا استاد ہندو ہا ۔ میں ݙوجھی پڑھدا ہم، چھوٹے ہوندے ہاسے کھیݙدے ہاسے۔ سکول اچ وݨ ہوندے ہن ، وݨیں دی گھاٹی چھاں ہوندی ہئی، پنڈ امب وی ہوندا ہا ، ٻیریں وی ہوندیاں ہن ، ٻیریں ٻیریں نال جھوریاں پیاں ہوندیاں ہن ، وٹے مار تے ٻیر لہیندے ہاسے، کھیݙاں کھیݙدے ہاسے، وݙیاں چَساں ہوندیاں ہن ،سکول کنوں پہلے قرآن پڑھݨ مسیت ویندے ہاسے۔ حافظ محمد حسین صاحب ݙاڈھا امدا سوہݨا پڑھیندے ہن ۔قرآن مجید سوہݨا پڑھدے مسیت پنج وقت نمازاں تے جمعاں تھیندا ہا ،مولود پڑھئے ویندے ہن ۔ سوہݨے سوہݨے سُریں آلے مولود خاں مولود سݨیندے ہن ، ہاں ٹھر پمدا ہا لوں لوں دے وچوں سرکارؐ دی محبت دیاں تاراں وڄدیاں ہن ، بندے دے اندر جو شوق پیدا تھیندے نکے لا توں تھیندے۔ اڄ جو کجھ ہیسے نکے لا دی تربیت دا حصہ ہے۔

حوالہ

کتاب "قیس فریدی ۔ فن شخصیت اَتے شاعری "  ترتیب پیشکش  : مہر حامد علی شاکر سیال ، ناشر جھوک پبلشرز ، ملتان