کوانٹم فزکسQUANTUM PHYSICS

"کوانٹم نظریے کوں پڑھ تے جیکوں زبردست جھٹکا نئیں لڳیا، اوں بندے ایں نظریے کوں سمجھیا ہی نئیں" _______ نیل بوہر

کوانٹم مکینکس سائنس دا اومشکل علاقہ ہے جیکوں ٻہوں گھٹ لوک جانڑدن۔لیکن اے سائنس دی اہم ترین دریافت اے۔جدید الیکٹرانکس،لیزر،ڈی وی ڈی، سمارٹ فون،ایم آرآئی،جی پی ایس تے کوانٹم کمپیوٹر وغیرہ کوانٹم مکینکس دی وجہ کنوں ہن۔

کوانٹم فزکس ہک اینجھی سائنس ہے جیندے نال ساکوں ایٹم، روشنی تے الیکٹران کوں سمجھݨ اچ مدد ملدی ہے۔ اے ٻہوں چھوٹی دنیا دی سائنس ہے۔ اگر اساں چھوٹی کنوں چھوٹی چیزیںݙو ونجݨٖ لڳوں تاں خلیے تک پُج ویسوں۔ خلیے دے اڳوں مالیکیول تے اوندے بعد ایٹم آ ویسی۔ ایٹم دے اڳوں پروٹان، نیوٹران تے الیکٹران آ ویسن۔ اے او مقام اے جتھاں کوانٹم اثرات واضح محسوس تھیوݨ لڳ پوسن۔ کوانٹم فزکس ساکوں اے ݙسیندی اے جو اے سارئیاں ٻہوںچھوٹیاں چیزاں کیویں کم کریندن۔ اے ساکوں کائنات دے بنیادی اصول ݙسیندی اے۔ اے ہک عجیب دنیا اے تے ایندے اصول ساݙی روزمرہ دی زندگی کنوں الگ ہن۔

ایہا وجہ ہے جو ایندا اثر عام زندگی اچ محسوس نیں تھیندا۔ 1900 اچ میکس پلانک نے اے دریافت کیتا جو روشنی ذرات نال مل تے بݨی ہے جیکوں فوٹان آکھیا ویندے۔ مگر کجھ ٻے تجربات اچ روشنی دا رویہ ہک لہر والی کار ہا۔

1930 اچ ݙو سائنس دانیں کلنٹن ڈیویسنCLINTON DAVISSON] [تے جارج پیجٹ تھامسن[GEORGE PAGET THOMSON] نے اے دریافت کیتا جو الیکٹران یا روشنی اپݨے سامݨے آوݨ والی شے دے آسوں پاسوں تھی کے گزر ویندی ہے۔ بالکل اینویں جیویں ہک پاݨی دی لہر کہیں رکاوٹ دے آسوں پاسوں تھی کے گزر ویندی ہے۔ ہیں دریافت تے اْنیں سائنس دانیں کوں نوبل پرائزݙتا ڳیا ہا۔

1980 اچ جاپانی سائنس دانیں کوانٹم اثر تے کم کر تے اے ثابت کیتا جو روشنی ہک لہر ہے۔

اْتے لکھی ساری بحث توں اے ثابت تھیندے جو الیکٹران کتھائیں ذرات آلی حالت رکھیندن تے کتھائیں لہر والی حالت رکھیندن۔ ایں مظہر کوں "ویو پارٹیکل ڈیولیٹی" [WAVE PARTICLE DUALITY]آکھیا ویندے۔ ایں "ویو پارٹیکل ڈیولیٹی" کوں کوانٹم فزکس دا دل آکھیا ویندے۔

"ویو پارٹیکل ڈیولیٹی" ہک اینجھی چیز ہے جیندے مطابق کوانٹم دے وجود کوں اساں ݙوہیں پاسوں لہر تے ذرے دی حالت اچ ݙیکھ سڳدوں۔

کلاسیکل فزکس اچ اے سمجھیا ویندا ہا جو ہک ذرہ یا کوانٹم خلا اچ ہک خاص جاہ تے پاتا ویندے تے ہک خاص سمت اچ حرکت کریندے۔ ا گر تُساں ہیں ذرے تے عمل کرݨ والی تمام طاقتیں دا حساب کتاب کر گھنو تاںتُساں ہیں ذرے دے بارے اچ سارا کجھ ڄاݨ گھندو جو اے ذرہ ہیں وقت کتھاں اے تے کن ݙو مونہہ کیتی ویندے۔ ایں طریقے نال تُساں ایں ذرے دے مستقبل تے ماضی دے بارے اچ وی سارا کجھ ݙسا سڳدو۔ ایں مظہر کوں "نیوٹن کلاک ورک یونیورس" [NEWTON CLOCKWORK UNIVERSE]آکھیا ویندے۔

"نیوٹن کلاک ورک یونیورس" دے نال ماہر فلکیات دان کہیں وی ستارے یا سیارے دے مستقبل دے بارے اچ ݙسا سڳدن۔ چندر تے سجھ دا پکڑیج ونجݨ وی ایں طریقے نال ݙسایا ویندے۔

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان