کمال خان مگسی
منشی محمد کمال خان مگسی بلوچ ہن۔ آپ ڈیرہ اسماعیل خان دے قصبے نواں کوٹ دے رہݨ والے ہن۔ ابتدائی تعلیم اتھاہیں دینی مدارس وچوں حاصل کیتی تے بقیہ زندگی ملتان ضلع کچہری وچ عرائض نویسی کریندے ریہے۔ کمال خان دیاں کافیاں بالکل اوڄوکے دور دیاں لڳدن۔ زبان ٻہوں ستھری تے رواں ہے۔ کافیاں وچ گیت دا رنگ چھلکدے۔ کمال خان مگسی مرثیے وی لکھیے انھاں دا ہک مجموعہ ’’مرثیہ غم‘‘ دے ناں نال شائع تھے۔ اینویں کافیاں دے ݙوں مجموعے اَڄ توں پوری ہک صدی پہلے دے چھپے ہوئے ملدن۔
نمونہ کلام: کافی
رانجھݨ نور حضور اکھیں دا
صورت شمس مثال ݙسے
کھیڑا بھیڑا ذات اویڑا
رانجھݨ صاحب اقبال ݙسے
رانجھݨ تخت ہزارے توں آیا
جھنگ وچ ننگ ناموس ونڄایا
منجھیاں دا چروال سݙایا
کارݨ ہیر سیال ݙسے
گھر گھر دے وچ ہوکاں پیاں
سوہݨیاں ما پیو سینڳیاں سیاں
رل مل ہیر کوں اکھن ڳیاں
اے ڳل سخت محال ݙسے
ولدا ہیر سُݨایا روکے
ہار ہنجھوں دے نیر پروکے
قادر جوڑیا آپ سنجوکے
نہ کجھ غیر خیال ݙسے
کمال خان مگسی دیاں کافیاں وچ زبان دی سادگی تے جذبات دی ہلکی ہلکی آنچ پاتی ویندی ہے۔ ہجر فراق تے انتظار کمال خان دی کافیاں دے خاص موضوع ہن۔ زبان اتنی نتھری ہوئی ہے جو اَڄوکی لڳدی ہے۔
تیݙے ٻاجھ دلبرا دل بے قرار اے
ݙینہ رات ڈھولݨا تیݙا انتظار اے
کیکوں ونڄ سنانواں میں درداں دیاں ڳالھیں
ہن غم ہزاراں جیڑا ہُݨ خوار اے
واہ واہ پیارے آ پریشان کیتو
تیݙے ٻاجھ ݙسدا جگ دھوں اندھار اے
ابرو تیغ ‘ اَکھیاں مژگاں ‘ تیر کاری
کیتا خون یارا کجلے دی دھار اے
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان