کلاڈیئس بطلیموس دے نظریات

کلاڈیئس بطلیموس دے نظریات CLAUDIUS PTOLEMY

بطلیموس رومی سلطنت دا ریاضی دان، جغرافیہ دان تے فلکیات دان ہا۔ حضرت عیسیٰ دی وفات دے 100 سال بعد پیدا تھیا تے 69 سال دی عمر اچ 170 عیسوی اچ فوت تھی ڳیا۔ بطلیموس سکندریہ اچ رہندا ہا۔

بطلیموسی ماڈل

بطلیموس کوں فلکیات دے علم نال ٻہوں دلچسپی ہئی۔ ہوں آکھیا ہا "جیڑھے میں ستارئیں دے ڳچھئیں کوں اپݨئیںگول رستئیں تے سفر کریندے ہوئیںݙیہداں تا میݙے پیر خوشی کنوں زمین تے نئیں پوندے"۔ بطلیموس نے کائنات دا ہک اپݨا ماڈل پیش کیتے جیکوں بطلیموسی ماڈل آہدن۔

بطلیموسی ماڈل دے مطابق زمین دے اردگرد 8 گول دائرے ہن تے زمین انیں دے درمیان اچ موجود اے۔ آخری دائرے دے ٻاہر کیا ہے؟ اے چیز بطلیموسی ماڈل اچ نئیں ݙسائی ڳئی۔ انسان اوں وقت جتنا کائنات کوںݙیکھ سڳدا ہا اے چیز ہوں کنوں ٻاہر ہئی۔ آخری دائرے کوں کائنات دی حد سمجھیا ڳیا ہا۔ دائرے دے اتے تارئیں دی پوزیشن ساکن ہے تے ہیں وجہ کنوں جیڑھے دائرہ حرکت کریندے تاں تارئیں دی ہک ٻے دے لحاظ نال پوزیشن تبدیل نئیں تھیندی۔ اندرونی دائرے سیارئیں تے مشتمل ہن۔ سیارئیں دی پوزیشن دائرے تے ساکن کینی بلکہ اے حرکت کریندے پن۔ دائرے دی حرکت تے سیارئیں دی اپݨی حرکت دی وجہ کنوں سیارئیں دا مدار سادہ نئیں بلکہ پیچیدہ اے۔ بطلیموس دا اے ماڈل کجھ مناسب ہا۔ بطلیموس اے سمجھدا ہا جو چندر اینجھے رستے تے چلدے جو کہیں وقت اوندا فاصلہ زمین کنوں ادھا رہ ویندے۔ ایندا اے مطلب ہا جو چندر کوں ہوں وقت ڈبل سائز دا  ݙسنڑاں چہیدا اے لیکن ایویں ہا کینا۔ بطلیموس کوں اپݨے ماڈل دی ایں خرابی دا پتہ ہا پیا لیکن ہوندے ماڈل کوں عمومی طور تے تسلیم کر گھدا ڳیا ہا۔ عیسائی چرچ وی ایں ماڈل کوں کائنات دی تصویر دے طور تے قبول کر گھدا ہا۔ کیونکہ انیں دا ایں ماڈل اچ اے فائدہ ہا جو آخری دائرے دے ٻاہروں جنت تے دوزخ واسطے ڈھیر ساری جاہ موجود ہئی۔ اے ماڈل پادریئں دے مذہبی عقائد کیتے مناسب ہا۔

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان