کفر دے فتوے

ہا سئیں ! وَل ڳالھ تھیندی پئی ہئی سڄݨیں دے ’’سَینھیں‘‘دی ۔ انہیں حدیث شریف دے حوالے نال ’’عورت‘‘ دی حکومت دی ڳالھ تے فتوے‘ قیل قال دی کیتی اے ۔ اساں دین تے ’’شریعت‘‘ دے ’’عالم‘‘ کینسے ۔ جیرھے ’’عالم‘‘ ہِن او ہینکوں مونہہ ٻادھاواں جواب ‘ ݙے ٻیٹھن تے اللہ دے کرم نال انہیں دا ’’ککھ‘‘ ننہیں رکھیا ‘ کتاباں چھپیاں ہویاں ہِن ۔ پر پڑھے کون؟ ۔’’مولویں‘‘ اپݨیاں تقریراں سُݨݨ دا جسکا لاتا ہویا ہے ۔ ہک فرقے دا مولوی جلسے اِچ ݙوجھے فرقے آلیں دے ’’چھوݙے‘‘ لہیندے تے ݙوجھے فرقے آلا تے وَل او ہینکوں’’رندہ‘‘ مریندے ۔ ݙوہیں مولوی اپݨیں اپݨیں منݨ آلیں دیاں ’’ککڑیں‘ ‘ چیر‘ حلوے مانڈے ‘ پیڑ ڈِھڈھ اَتے کھیسے بھر ٹُر ویندن تے لوک آپت اِچ آڑو ٻٹ تھے رہندن۔

اسیݙی بھیݨ بی بی بے نظیر 1973ء دے آئین موجب مُلک دی ’’وزیراعظم‘‘ بݨی اے ‘ ہِیں آئین تے حضرت مولانا مفتی محمود رحمتہ اللہ علیہ‘ مولانا عبدالحق (اکوڑہ خٹک)رحمتہ اللہ علیہ‘ حضرت مولانا شاہ احمد نورانی مدظلہ العالی‘ قومی اسمبلی دے ممبر (ہوں وقت) ٻے ٻہوں سارے ’’عالمیں‘‘ تے پروفیسر غفور احمد ہوریں دے دستخط ہِن ۔ کیا اِنہیں کوں ’’دین تے شریعت‘‘ دا ’’عِلم‘‘ تے ’’سُدھ‘‘ ہینیں’’مولویں‘ کنوں گھٹ ہئی جیرھے اَڄکل دھاڑ گھتی وَدّے ہِن؟۔

کیا ’’مئی فاطمہ جناح‘‘ عورت کائناں ہئی؟ جیندی کامیابی کیتے مولانا مودودی صاحب وی اپݨا ’’فتویٰ‘‘ بدلیا ہا تے بھڄ دُھرک کیتی ہئی ‘ مئی فاطمہ جناح تاں ملک دی ’’صدر‘‘ بݨݨ کیتے الیکشن لڑیا ہا او جیکر جِتّ ونڄے ہا تاں ’’سربراہِ مملکت‘‘ بݨے ہا ۔ بی بی بے نظیر تاں ’’سربراہِ حکومت‘‘ ہے ‘ سربراہِ مملکت دے فرق داوی علم کائنی ۔ سربراہِ مملکت تاں غلام اسحاق خان اے ‘ اعتراض کرݨ آلے ’’مولویں‘‘ کوں تاں ’’سربراہ مملکت تے سربراہ حکومت‘‘ دے فرق دا وی علم کائنی ۔ جے علم نِیں تاں وَل ڄاݨ تے بے ایمانی کریندن ۔ ’’نیک بندے ‘‘جو تھے ‘ ایہ ’’مُلاں‘‘ جے اپݨے آپ کوں ’’سچا‘‘ اَکھیندن تاں وَل اپݨیں ’’وݙیں‘‘ کوں ’’کُوڑا‘‘ آکھن اَتے ایہ وی نا آکھن جو ایہ ’’اپݨے ’’وَݙیں‘‘ کنوں وݙے ’’عالم‘‘ ہِن۔

ٻی ڳالھ ایہ ہے جو ’’انہیں‘‘ مولویں کوں چھڑی بی بی بے نظیر اِی ’’عورت‘‘ ݙسدی اے۔ صوبائی اسمبلیں تے قومی اسمبلی اِچ اَپݨے نال ٻہݨ آلیاں ’’بیبیاں‘‘ عورتاں نی نظردیاں جنہیں کوں ممبر بݨݨ کیتے خود ’’انہیں‘‘ مولوی ‘ ووٹ ݙتے ہَن اَتے سینٹ دی ممبری گھنݨ کیتے انہیں ممبر بیبیں دے ’’ووٹ‘‘ آپ وی گھدے ہانیں ’’سی او پی‘‘ دے ناں نال حکومت دیں مخالف جماعتیں جیرھی رابطہ کمیٹی ’’بݨائی‘‘ ہوئی ہئی اوندی سیکرٹری بی بی عابدہ حسین ہوریں ہِن ۔ کوئٹے وچ بی بی عابدہ حسین ہوریں دی صدارت اِچ جیرھا اجلاس تھیا ہا ۔ اوندے اِچ مولانا سمیع الحق ‘ مولانا فضل الرحمن تے ݙوں ترائے ٻے مولوی‘ ݙاڑھی چونڑیں کوں کنگھیاں ݙے تے ونڄ ٻیٹھے ہَن۔ مولانا سمیع الحق تاں بی بی سیَݨ نال گوݙے تے گوݙا لا تے ’’تصویر‘‘ وی چِھکوائی ہئی جیرھی اخباریں اِچ چھپی ہئی ۔ آپ اِی غور کرو ۔ اساں کجھ آکھسوں تاں رَنج تھیسو۔

ریہا کفر دا ’’فتویٰ‘‘ تاں سئیں میݙا ’’جیرھے ’’مولوی‘‘ لوکیں ‘ کوں ’’کافر‘‘ بݨاوݨ کیتے کندھیاں کالیاں کیتی ویندن‘ اُنہیں کنوں پُچھو جو ایہو ’’فتویٰ‘‘ اُنہیں دے ’’وݙیں‘‘ کیوں کائناں ݙتا ہا ۔ ایہو کجھ ’’حق سچ‘‘ ہے تاں اُنہیں دے ’’وَݙیں‘‘ ایہو حق سچ کیوں لُکایا ؟ مولانا ظفر علی اظہر مرحوم اَتے مظفر علی شمسی مرحوم کون ہَن؟ کیا او مولانا سید عطاء اللہ شاہ بخاری رحمتہ اللہ علیہ تے ݙوجھیں ’’عالمیں دے جُٹ‘‘ کائناں ہَن؟۔

ایہ تاں گزری کلھ دی ڳالھ اے ‘ اُنہیں ’’مولویں‘‘ کنوں پُچھو جو آئی جے آئی‘‘ اِچ آغا مرتضیٰ پویا دا ’’عہدہ‘‘ کیا ہے؟ کیا او ’’شیعہ‘‘ نِیں؟ ۔ کیا جمعیت علماء اسلام دا درخواستی گروپ آئی جے آئی اِچ شامل کائنیں ؟۔ کیا ’’جمعیت‘‘ دا فضل الرحمن گروپ  سی او پی اِچ شامل کائنی؟ اُنہیں کنوں پُچھ جو سی او پی دی ’’لیڈر‘‘ بی بی عابدہ حسین‘‘ شیعہ نیں؟۔

سئیں میݙا ! ایہ اندروں ہک ٻے نال ‘ہکو کجھ ہِن۔ چھڑا تسیکوں اَسیکوں آپت اِچ لڑا تے فیدہ چیندن‘ ہر کہیں دی اَپݨی اَپݨی دکانداری ہے۔ اللہ آباد دے ہک بھراحاجی سیف اللہ ہوریں دے واروں ’’کوڑیج‘‘ ڳن ۔ ناحق اِی کاوڑیے ہِن ۔ حاجی سیف اللہ ہوریں نال ۔ اَسیݙی پُراݨی ’’ٻٹ کڑاک‘‘ ہے ۔ ہک واری اُنہیں اسیکوں ’’خوشامدی‘‘ تے برآمدی‘‘ دا فرق وی سمجھایا ہا ۔اُنہیں ݙسایا ہا جو ’’خوشامدی‘‘ اوہو ہوندے جیرھا پَرے کنوں بھڄ تے ’’جی آئیں کوں آکھے تے ’’برآمدی‘‘ اوہو ہوندے جیرھا ’’ٻاہر‘‘ پُڄا تے روانہ کرے ۔

چھیکڑی ڳالھ ایہ ہے جو ’’ٻٹ کڑاک‘‘ کوں ’’ٻٹ کڑاک‘‘ سمجھ تے کِھلدیں ہَسدیں ۔ پڑھیا سُݨیا کرو ۔ ڳالھ ڳالھ تے کوڑیج نہ ڳے کرو ۔ تُسیݙی کاوڑ ڈھری کرݨ کیتے ’’ٻٹ کڑاک‘‘ دی جاہ تے لکھتاں‘ لکھݨیاں پِمدین ۔ اسیکوں آپ کوں بھوڳ آ ویندے۔

جمۃ المبارک29؍جون1990ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان