کشش دی قوت

کشش دی قوت GRAVITATIONAL FORCE

کائنات اچ ہر ݙو جسم ہک ٻے کوں کشش دی قوت نال آپ ݙو چھکیندے پن۔ جتنا کوئی جسم زیادہ باری ہوسی او اتنا زور لا تے ٻے جسم کوں آپ ݙو چھکیسی۔ اجسام دے درمیان فاصلہ ودھ ونڄݨ نال اے قوت گھٹ تھی ویسی۔

کشش دی ہِیں قوت دی وجہ کنوں ہر چیز زمین تے ڈھاندی اے۔ زمین ساݙے مقابلے اچ ہک ٻہوں وݙا تے باری جسم اے، اساں وی زمین کوں آپ ݙو چھکیندوں لیکن زمین دی کشش دی قوت ساݙے کنوں ٻہوں زیادہ اے جیندی وجہ کنوں اساں زمین نال چمبڑیے پیوں۔ سیب یا کوئی وی پھل کشش دی قوت دی وجہ کنوں زمین تے ڈھاندے، اُتے اسمان ݙو نئیں ویندا۔ قوت دے ایں سائنسی قانون کوں نیوٹن  [NEWTON]نے دریافت کیتا ہا۔

کشش دی اے قوت باقی ترے قوتیں کنوںٻہوں کمزور اے لیکن ایندا اثر اݨ کُھٹ فاصلے تک ہوندے۔ سجھ کشش دی ہِیں قوت نال زمین تے باقی ست سیارئیں کوں آپ ݙو چِھکی کھڑے تے سیارے ہوندے اردگرد اپݨے اپݨے خاص رستے تے گھمدے پن۔ ایں قوت دا بنیادی ذرہ گریویٹان [GRAVITON]اے۔ اے حالی تک دریافت نئی تھیا۔ سائنسدانیں کوں یقین اے جو اے ذرہ موجود اے۔ چندر وی کشش دی ہِیں قوت دی وجہ کنوں زمین تے سجھ دے اردگرد گھمدا پے۔

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان