کرول باغ دی سیل

کرول باغ نویں دِلّی دا ٻہوں وݙا تے معروف علاقہ ہے ۔عوامی کاروباری مرکز ہے ۔ نویں دِلّی دا مرکز ہے ۔ ٻہوں وݙی اَبادی اِتھاں وسدی ہے ۔ اَساں وی کرول باغ وچ راہندے پئے ہاسے۔ بہاول پور بھون پُچیوسے تاں ساݙے باقی سنگتی حالی نہ اَئے ہَن ۔ اَڄ اساں ترے گروپاں اِچ ونڈیج ڳئے ہاسے ۔ پہلا گروپ راج کمار ملک نال ہا جیندا حال اُتّے آ ڳے ۔ ݙوجھا گروپ جمشید دھریجہ دی اڳواݨی وچ عابد سیال تے موہن بھگت دا ہا ۔ تریجھا گروپ راشد مصطفیٰ ‘ طاہر دھریجہ ‘ مسز طاہر دھریجہ تے مجاہد بھٹّی دا ہا ۔ ایہ گروپ الڳ الڳ ڳئے ہَن ۔ ایہ شاہی قلعہ ‘ جامع مسجد‘ غالب اکیڈمی ‘ مزار خواجہ نظام الدین اولیاء ‘ مزار غالب وغیرہ ݙیکھ اَئے ہَن ۔ اُنہاں میٹرو ٹرین تے سفر کیتا ہا تے 100/-روپے دا پاس بݨوا گھدا ہا ۔ اِتّی دیر اِچ سارے سنگتی بھون پُڄ ڳئے ۔ سبھݨائیں اپݨا حال سُݨایا ۔ میݙے کیتے تاں سبھ کجھ نواں ہا۔

شام کوں اساں وَلا کرول باغ دی سیل کیتے ٹُر پیوسے۔ ہُݨ جمشید دھریجہ آلا گروپ وی ساݙے نال ہا ۔ ظہور دھریجہ تے فرید پیرزادہ موہری ہَن۔ پرساد نگر کنوں ٹُردیں اَساں جینز دے کپڑیاں دی مارکیٹ کن ڳیوسے ۔ میں موہن بھگت کوں آکھیا جو اِتھاں (دِلّی وچ) پاوݨ کیتے ہک پتلون تے بوشرٹ گھن چا ۔ اونیں آکھیا ٹھیک ہے۔ جینز مارکیٹ وچ کئی دکاناں اُتّے اساں اوندے کیتے جینز دی پینٹ لبھی۔ سڑک تے بزاراں وچ چِکڑ ہا ۔ ٹُرݨ پِھرݨ اوکھا ہا ۔ بر حال بچدیں بچیندیں اساں بزار ݙٹھے ۔ کرول باغ وچ سیون ٓپ دیاں بوتلاں پیتیاں۔ اِتھّاں بوتل 300م۔ ل ہے۔ ساݙے آلی بوتل کنوں 50م ۔ل زیادہ ۔ مُل 13/-روپے ہے ۔ پاکستانی رقم 23.25روپے بݨدی ہے ۔ اخیر موہن بھگت کوں ہک جاء تے پینٹ پسند آ ڳئی ۔ اُونیں شرٹ وی خرید کیتی اَتے او وی دیسی انگریزاں اِچ رَل ڳیا ۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان