کتاب لڑی "حوا"

اداریہ

ایندے وچ کئی شک نئیں جو ساݙے وسیب تے مرداں دی حکمرانی چلدی اے ۔ ایں وسبے وچ تریمت کوں مجموعی طور تے او مقام تے اہمیت نی ݙتی ویندی جیندی جو او واقعی حقدار ہے پر اے وی نِرا پرا سچ اے جو عہد موجودہ تئیں تریمتاں وی ایں غلامی کوں قبول کیتا ہوئے اساں جیکرائیں نِرڳی ادب دی ڳالھ کروں تاں دنیا دے ہر ادب وچ تریمتاں آپݨے قلم تے فکر راہیں آپݨے آپ کوں تے خصوصاً آپݨے فن و فکر کوں منوا  ݙکھائے۔ جے کرائیں اساں سرائیکی ادب دی ڳالھ کروں تاں سوجھل سنڄاپو تھیندے جو سرائیکی شعر و نثر دی دنیا وچ جتھاں مرداں ادبی اڳواݨی کیتی اے اتھائیں تریمتاں وی شعر و نثر دی لکھ پڑھ وچ اپݨا خاصہ اہر کیتے۔ ناول سنواں ناول لکھیے افسانے سنواں افسانہ ستریئے خاکہ لکھیے انشائیہ لکھیے آپ وہاݨی تے پندھ وہاݨی لکھی اے، مضمون لکھیے، کہانی لکھی اے تے شاعری وی ، جملہ اصناف سخن وچ لکھݨ دا ٻاݨ ماریے۔ اے الگ ڳالھ اے جواڄݨ تئیں کئیں اے شاہ پارے تخلیق نئیں تھی سڳئے پر جئیں فن پارے لکھݨ دی روایت شروع کیتی اے اوندا انت شہ پاریاں تئیں ضرور پُڄسے بشرط اے جو انہاں لکھاری تریمتاں کوں کوئی مناسب پِڑ دستیاب تھیا تاں۔ جیڑھا اڄاں تئیں میسر کینی اساکوں مہیا نی کیتا۔

فطرت پُچھدی اے جو تساں خود کیا کیتے جیڑھے انسان خود ٻاݨ مارݨ پئے ویندے ہن تݙاں فطرت وی ٻانہہ ٻیلی تھیوݨ پئے ویندی اے۔ ایں کارن اساں کجھ تریمتاں رل کرائیں اپݨی دنیا آپ پیدا کرݨ کیتے ’’اماں حوا‘‘ دے ناں دی ہک کتاب لڑی سلسلہ شروع کریندے پئے ہاں ہیں جیندے وچ نِرڳا سرائیکی تریمتانواں تخلیقی ادب چھپسے او بھانویں تخلیقی، تنقیدی، تحقیقی کہیں وی ونکی دا ہوسے ۔ اے پلیٹ فارم نو آموز تے کہنہ مشق لکھاری تریمتاں کیتے ہے۔ ایندے سُدھارے ودھارے تے نکھارے کیتے ہر سرائیکی لکھاری تریمت دی صلاح کوں سوبھ ݙتا ویسے، تساں چھڑا لکھݨ تے پڑھݨ دا اہر کرو تہاکوں ایں تاریخی ادبی کم دا حصہ بݨاوݨ اساݙا فرض ہے۔ اے  کتاب لڑی سرائیکی تریمتانویں ادب دی تحریک دا موہری پکھ ثابت تھیسے۔

  عارفہ ممتاز، چیف ایڈیٹر