کتاب: رَلے پندھ کریسوں

مَیں کتاب چھپوائی تاں پہلی کتاب چھپݨ دے بعد میکوں اتنی پذیرائی ملی جو میݙے اندازے کنوں وی ٻہوں زیادہ ۔ کوئی آکھے تساں عورت ، تریمت ادب اِچ وادھا کیتے ، کوئی آکھے سرائیکی ادب اِچ وادھا ہے ، تہاݙی کتاب چھپݨ دی ٻہوں خوشی تھئی اے ، سر فخر نال کجھ اُچا تھی ڳیا ہے ۔ چلو میں جھیں نکمی عورت وی کوئی چنگا کم تھوڑا جیہاں کر گھدا ۔ کوئی آکھے کیا واقعی ایہ کتاب تساں لکھی ہے ۔ تہاݙی اپݨی لکھی ہوئی ہے؟ حیرانی اَتے تکلیف تھیوے ایہو جہیں خیالات سُݨ تے ہر بندے دی سوچ دا اپݨا اپݨا معیار ھے ، مَیں آہدی آہدی رہ ڳئی جو تہاݙا کوئی مسودہ چوری تاں نی تھیا؟

کہیں پاسوں فرمائش اَئی ، کتاب تاں ݙیکھ گھدی اے ہُݨ کتاب لکھݨ آلی دی فوٹو وی ݙیکھوں ہا۔ مَیں آکھیا رونمائی کتاب دی جئیں ویلھے تھیسی تساں ضرور تشریف گھن آواہے۔ کہیں آکھیا اچھا پوری فوٹو نہ تاں ہتھ دی فوٹو ہووے پئی ۔ آفرین ہے بھئی عورت دے بارے چوݙاں سو سال پُراݨی سوچ اَڄاں (اسلام دی نہ کفر دی) ودی ہے ۔ مَیں عثمان خان کوں کِھل تے ݙسایا جو میݙے فین میݙی فوٹو منگدن ۔ عثمان خان آکھیا میݙی نانی دی فوٹو عینک آلی ٻہوں پیاری فوٹو ہئی ، او ودی ہووے ہا تاں فوٹو منگݨ آلیں دو سینڈ کر چھوڑ۔ میکوں اپݨی کوتاہی تے ٻہوں ارمان تھیا جواو تاں ڈیلیٹ تھی ڳئی ہئی ۔ ہُݨ کیا تھی سڳدے ۔

ریاض میلسی صاحب کوں میں آکھیا میݙی اماں کوں ریڈیو نال عقیدت ہئی ، غور نال ریڈیو دے پروگراماں اِچ دلچسپی گھندے ہَن ۔ ایں سانگوں میں ریڈیو آلیں کوں اپݨی کتاب ݙتی ہے ۔ میلسی صاحب فرمایا اپݨی امی کوں میݙے سلام آکھسو چا ، میں آکھیا جیا ضرور۔ جݙاں وی قبرستان ویساں تاں ، اُنھاں جواب ݙتا اوہو سوری۔

حوالہ

کتاب: رَلے پندھ کریسوں ، مصنّف: زاہدہ اجمل ہاشمی، چھاپہ خانہ : جھوک پرنٹرز‘ ملتان