کبوتر بازی
حمید قصائی نال یاری نِکیں لاء دی ہے ، حمید قصائی ݙاڈھا چترا تے پھُرتیلا ہا اُونکوں کبوتریں دا ݙاڈھا شوق ہا ،کوٹھے دی چھت تے کبوتریں دیاں کھُݙیاں بݨائی کھڑا ہا،گھر دی حویلی ء ِچ وݙی ٻیر ہس ، ٻیریں نال جھوری پی ہوندی ہئی ،ٻیر تے کُتڑیاں وی ݙاڈھیاں ہوندیاں ہن ،ٻیر چُنڑدے ہاسے ، کُئی نہ کئی اُتوں آ پمدی ہئی ، چِیکاٹ نکل ویندے ہن، ہک واری میں ݙاݙی کنوں پچُھیا جو کُتڑی کیا ہوندی اے ؟ ݙاݙی آکھیا !اے نِکی کُتی ہوندی ءِ، اے کنوں پرے رِیہے کرو، حمید قصائی دیاں روز سیٹیاں سُنڑدے ہاسے ، کبوتر اُݙیندا ہا ،اسمانی ،باز، بازیگر، زرد، چِٹا، کالا، بھورا، گولا، کھیݙݨاں ، جوڳیاتے ایہو جے ٻے ڈھیر سارے ناں ہوندے ہن۔دُغزے نال ٻے پاسوں آنوݨ آلے کبوتر کوں پکڑیندا ہا،ابا کَوڑیندا ہا، جوتیݙی کبوترباز نال یاری ءِ، توں وی کبوتری باز بݨسیں ، اللہ سئیں بچایا کبوتری باز نہ بݨیوسے پر ملتان ایہو جہی جھاہ تے آ ٻیٹھوں جتھاں کبوتریں دی عالمی منڈی ء ِ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان