کانڈھایاد رہسے

ہک روہیلا اسیݙی وستی کانڈھا ݙیوݨ آیا ، پتر دی شادی ہَس ، وݙا کائنا ہا ، گھر ڳبھرو ٻال کھڑا ہا ، چندر دی یارہی تے خمیس دا ݙینھ ، پتر یاد کر گھن ، ٻال آکھیا ٹھیک اے چاچا سئیں  ۔ روہیلے آکھیا یاد ءِی ؟ ٻال آکھیا جیا سئیں  ! کیا آکھیُس ؟ چندر دی یارہی تے خمیس دا ݙینھ۔

روہیلے آکھیا شابس ، ہتھ ݙے ، ٻال ہتھ ݙتا ، روہیلے زور دا چک پاگھدا ، ٻال دی چیک نکل ڳی ، آکھیس چاچا اے کیا کیتی ۔ روہیلے آکھیا پتر ہُݨ کانڈھا تیکوں  پکا یاد رہسے ۔ او بندہ ہُݨ وی حال ݙیندے تے آکھدے چِٹی ݙاڑھی تھی ڳی کانڈھا نی بُھلیا۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان