کالی کرشن متر

کالی کرشن متر
معلومات شخصیت
پیدائش	سنہ 1822ء   کولکاتا
تاریخ وفات	2 اگست 1891ء (68–69 سال)
شہریت	برطانوی ہند
عملی زندگی
مادر علمی	ہیئر اسکول
پیشہ	انسان دوست ،  اکیڈمک
مادری زبان	بنگلہ

کالی کرشن متر (1822ء - 2 اگست 1891ء) بنگال دے ہِک مخیر، معلم تے مصنف ہَن۔ اُنّھاں نے ہندوستان وِچ سبھ توں پہلا غیر سرکاری زنانیاں دا اسکول قائم کِیتا ہئی۔

ذاتی حیاتی

کالی کرشن متر دی پیدائش برطانوی ہند وِچ کلکتہ وِچ تِھئی۔ اُنّھاں دے والد دا ناں شیوناراین متر ہئی۔ اُنّھاں نے ابتدائی تے ثانوی تعلیم ہیئر اسکول وِچ حاصل کِیتی تے بعد وِچ پریزیڈنسی کالج وِچ داخلہ گِھدّا پر معاشی مجبوریاں دی وجہ توں اُنّھاں کوں اپݨا تعلیمی سلسلہ روکݨا پِیا۔ اِیں دے بعد اوہ باراسات وِچ واقع اپݨی نانیہال وِچ قیام پزیر رہئے۔ اُنّھاں دے وݙّے بھائی نوین کرشن متر ہِک معروف معالج ہَن۔

سماجی حیاتی

کالی کرشن متر بنگال دے اصلاح سماج دے اقدامات تے ترقی پسند تعلیمی تحریک دے سرگرم کارکن ہَن۔ 1847ء وِچ اُنّھاں نے اپݨے بھائی نوین کرشن تے ماہر تعلیم پیارے چرن سرکار دے نال رل تے باراسات وِچ ہِک نجی زنانیاں دا اسکول قائم کِیتا۔ ہندو اشرافیہ دے خانداناں دیاں ڄَئیّاں کِیتے اِیہ پہلا اسکول ہئی جیڑھا ہِک ہندوستانی نے قائم کِیتا ہئی۔ شروع وِچ اِیں اسکول وِچ صرف ݙو ڄَئیّاں ہَن جیندیاں وِچوں ہِک نوین کرشن دی ڄائی کنتی بالا ہئی۔ اِیں ویلھے دے ہندو زمینداراں تے قدامت پرست سماج اِیں طرحاں دیاں کوششاں دے سخت مخالف ہَن پر ایشور چندر ودیا ساگر تے جان ایلیٹ ڈرنک واٹر بیتھون نے کالی کرشن دی اِیں عظیم کوشش کوں سَراہا تے اُنّھاں دی مدد کِیتی۔ بعد وِچ اِیں اسکول دا ناں کالی کرشن گرلز ہائی اسکول کر ݙِتا ڳیا۔ 1849ء وِچ جݙݨ بیتھون کاؤنسل آف ایجوکیشن دے صدر دی حیثیت نال اُتّھاں ڳئے تاں اوہ وی خاصے متاثر تِھئے تے اُنّھاں کوں تحریک مِلی۔

کالی کرشن نے باراسات وِچ سائنسی زراعت، شجرکاری تے تحقیق کِیتے 150 بیگھہ زمین دا انتظام کِیتا تے اِیں مقصد کِیتے اُنّھاں نے انگلستان توں جدید آلات منگوائے۔