کائنات دا سفر ۔ سرائیکی قوم کیتے تحفہ خاص

رب عظیم نے انسان دے اندر تجسس دا مادہ ازل کنوں رکھیے ۔ اے تجسس دا مادہ ہی ہے جیندے سہارے انسان نے اپݨی سائنسی ترقی دا سفر ایں موڑ تک آ کھڑائے جو اڄ او تسخیر کائنات اچ مصروف اے۔ تجسس دی جان سوال اچ پوشیدہ اے ۔ سوال آپ اڳوں تے درست جواب دے رستے تلاش کریندے۔ سوال علم دی معراج اے تے سائنس تے فلسفے دی بنیاد اے ۔

بقو ل پال ڈیویز سائنس نامعلوم دیسیں دی تلاش دے سفر دا ناں اے۔ اے کتاب انسانی تجسس دا ہتھ پکڑ کے کائنات دی ابتدا کنوں لا تے کائنات دی موجودہ حالت تے اڳونہی دی سیر کرویندی اے تے قاری دے ذہن اچ علم دی جوت جڳیندی ہے۔ ݙوجھیں لوظیں اچ اے کتاب قدیم یونان دے زمین دے مرکز ہووݨ دے نظریے کنوں گھن تے ہاکنگ تک دے نظریات سلیس تے سادہ ز بان اچ بیان کریندی اے۔ 

جعفر بزدار دی سائنس دے علم نال دلچسپی طالب علمی دے زمانے کنوں لا تے اڄ تک قائم اے بلکہ ایندے اچ مسلسل اضافہ تھیندا پے۔ اے کتاب اوں دلچسپی دا پکا ثبوت اے۔

رب کائنات نے قرآن مجید اچ انسان کوں تسخیر کائنات دا درس ݙتے اور سچ دی تلاش انسان دا پہلا فرض مقرر کیتے۔ سائنس دا اے دعوی جو کائنات سنگولیریٹی کنوں بگ بینگ دے بعد وجود اچ ائی اے، رب کائنات نے 1400 سال پہلے اپݨی کتاب عظیم اچ اے ݙس ݙتے جو اسمان تے زمین پہلے بند ہن جیکوں اساں اپݨی قدرت نال کھول ݙتے ۔

ساݙے ملک اچ سائنس دے پڑھاوݨ دا غیر حقیقی طریقہ ساݙا مقدر اے، جیرھا ٻال کوں رَٹا لاوݨ تے مجبور کریندے تے سائنس دے مضمون کوں نہایت غیردلچسپ کر ݙیندے۔ جیرھے تعلیم دا مقصد ای صرف زیادہ نمبریں دا حصول ہووے اور زیادہ نمبر صر ف رَٹے نال ممکن ہوون تاں ول سمجھݨ دی کیکوں ضرورت اے۔ جیڑھی قوم بغیر سمجھیے قرآن مجید پڑھدی ہووے اوندی گُھٹی اچ سمجھݨ دا مادہ تاں موجود ای نئیں ہوندا۔ اور جیرھے بغیر سمجھیے ہی تعلیم حاصل کرݨی ہوے تاں ہر مضمون بے جان ہوکے غیر دلچسپ تے زندگی دے حقائق کنوں پرے تھی ویندے۔ جیویں جو اٹامک انرجی کمیشن دے چئیر مین ڈاکٹر عشرت حسین عثمانی اپݨی ہک تقریر اچ آکھیا ہا جو جے تک اے قوم سائنس تے ریاضی دی مساوات کوں سُݨ تے جھمر دی پھیری پا مست نہ تھیسی، جیویں جو بندہ میر یا غالب دا شعر سُݨ تے وجد اچ آ ویندے اوں وقت تک اے قوم سائنس تے ٹیکنالوجی اچ ترقی نئیں کر سڳدی۔

سائنس کوں اوندے کنسپٹ تے تخیل نال پڑھاوݨ علمی ترقی دی معراج اے تے دنیا اچ علمی اقتدار دی بنیاد اے۔ جعفر بزدار دی اے کتاب ہک انقلابی کتاب اے جیڑھی ساݙے ملک اچ رائج سائنسی تعلیم دے پڑھاوݨ دے طریقے کوں ہکل مریندی اے۔ ایں کتاب اچ نہایت لطیف پیرائے اچ سائنس دے مشکل نظریات کوں آسان کر تے ورتیا ڳے۔ اے کتاب سرائیکی قوم کیتے تحفہ خاص ہے۔ 

  عبدالسمیع مجاز

ساہن والا

30-12-2020

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان