کائنات دا سفر ۔ سرائیکی زبان داجام جم
مہرے والا جادو نگری ہے۔ لوک تربیت یافتہ ، اکھریں دے سیوک تے سر سنگیت دے کن رس ہن۔ اتھاں لوظیں دی صنعت گری عام اے۔ ساوݨ دی لوڑھ کینی ۔ اتھاں بن بادل اکھریں دی رم جھم جھڑی ہر ویلھے رہندی اے۔ شعوری طور تے خوش نصیب شہر اے ۔ ایں باشعور ماحول اچ سئیں جعفر بزدار اکھ کھولی اے۔ ہکے چولے وچ پہلا سرائیکی میلہ ݙٹھس۔ پڑھائی وچ لائق ہا ۔ تعلیمی پوڑیاں چڑھدا ڳیا تے آخر مقابلے دا امتحان پاس کر تے تھاݨے دار بݨ ڳیا۔ طبیعت نال پولس دی نوکری دا جوڑ نہ بݨیا۔ ادبی تے سائنسی مزاج رکھݨ آلے کوں اے ماحول پسند نہ آیا تے او استعفی ݙے گھر آ ڳیا، تدریس تے وکالت دے پیشے کوں اپنا گھدا۔ علم نال سانگا جاری رکھ تے سرائیکی زبان دی پہلی کتاب جیڑھی کائنات دے سائنسی علم تے سند دا درجہ رکھیندی اے، لکھݨ شروع کر ݙتی۔ اے کتاب سائنس دے علم کوں سمجھݨ کیتے جام جم دا درجہ رکھیندی اے۔ جڳ جہان دے سائنسی کارنامے ایں کتاب اچ موجود ان۔ دھرمی لوکیں دی مخالفت ، چرچ تے ریاست دا گٹھ جوڑ اینجھا سفاک ہا جو سائنسدان قتل کیتے ڳئے۔ جڳ مشہور سائنسدان برونو کوں زندہ جلا ݙتا ڳیا۔ اوندا جرم اے ہا جو اوں ارسطو تے تنقید کیتی ہئی۔ گلیلیو کوں 14سال قید بامشقت آ ڳئی۔ او اے آہدا ہا جو میں اسمان دی چٹھی نئیں منیندا، میݙا ایمان انسانی عقل تے ہے۔
یکے ناں میں نہ ݙساں، کجھ آپ وی پڑھو،' کائنات دا سفر' ٻہوں عظیم کتاب اے تے سرائیکی زبان دی بے مثال خدمت اے۔ میں ایندا ہک ہک لوظ پڑھیم، میݙے علم اچ ودھیک اضافہ تھئے تے عقل دے نال میݙا پیار ودھ ڳئے۔
صوفی تاج گوپانگ
فاضل پور ؎
23-11-2019
حوالہ
[لکھو | ماخذ وچ تبدیلی کرو]کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان