ڈیوڈ پولٹزر

ڈیوڈ پولٹزر

ہیوج ڈیوڈ پولٹزر (ڄمݨ دی تریخ 31 اگست 1949) ہک امریکی نظریاتی طبیعات دان تے کیلیفورنیا انسٹیٹیوٹ آف ٹیکنالوجی وچ رچرڈ چیس ٹولمین پروفیسر آف تھیوریٹیکل فزکس ہن ۔ انھاں کوانٹم کرومو ڈائنامکس وچ ایسمپٹوٹک آزادی دی دریافت کیتے ڈیوڈ گراس تے فرینک ولزیک دے نال 2004 دا نوبل انعام برائے فزکس ونڈیا ۔

جیوݨ جوڳ تے گزر گزران

پولٹزر نیو یارک شہر وچ ڄمے ہن ۔ انھاں دے پیو ایلن (ہنگری: Aladár) ہن جیڑھے 1920 تئیں ہنگری دی بادشاہی وچ ناڈسیگ ، پوزسونی کاؤنٹی وچ ڄمے ہن ، ول چیکوسلواکیہ ، (1938-1945 وچ دوبارہ ہنگری) تے 1991 توں سلوواکیہ ہن ۔ انھاں دی ماء ویلیری پولٹزر ہن تے او وی ہنگری-یہودی ہن ۔ تے او 1939 وچ چیکوسلواکیہ توں انگلینڈ فرار تھی ڳئے ہن تے ݙوجھی عالمی جنگ دے بعد امریکہ ہجرت کر ڳئے ہن ۔ انھاں 1966 وچ برونکس ہائی سکول آف سائنس توں گریجویشن کیتی ، 1969 وچ یونیورسٹی آف مشی گن توں فزکس وچ بیچلر دی ڈگری تے 1974 وچ ہارورڈ یونیورسٹی توں پی ایچ ڈی حاصل کیتی ، جتھاں انھاں دے گریجویٹ مشیر سڈنی کولمین ہن ۔

اپݨے پہلے شائع شدہ مضمون وچ ، جیڑھا 1973 وچ شائع تھیا ، پولٹزر ایسمپٹوٹک آزادی دے رجحان کوں بیان کیتا: کوارکس ہک ٻئے دے جتنے نیڑے ہوندے ہن ، انھاں دے درمیان مضبوط تعامل اتنا ہی کمزور ہوسی ۔ جݙݨ کوارکس انتہائی نیڑے ہوندے ہن ، تاں انھاں دے درمیان نیوکلیئر فورس اتنی کمزور ہوندی ہے جو او تقریباً آزاد ذرات دی طرح سلوک کریندے ہن ۔ ایہ نتیجہ — جیڑھا تقریباً اسی وقت پرنسٹن یونیورسٹی وچ گراس تے ولزیک ولوں آزادانہ طور تے دریافت تھیا ہا — کوانٹم کرومو ڈائنامکس دی ترقی وچ ٻہوں اہم ہا ۔ تھامس ایپلکوسٹ دے نال ، پولٹزر "charmonium" دی موجودگی دی پیش گوئی کرݨ وچ وی مرکزی کردار ادا کیتا ، جیڑھا جو ہک سب ایٹمی ذرہ ہے جیڑھا ہک چارم کوارک تے ہک چارم اینٹی کوارک توں بݨدا ہے ۔

پولٹزر 1974 توں 1977 تئیں ہارورڈ سوسائٹی آف فیلوز وچ جونیئر فیلو ہن ، ول کیلیفورنیا انسٹیٹیوٹ آف ٹیکنالوجی (Caltech) منتقل تھی ڳئے ، جتھاں او اڄ کل نظریاتی طبیعات دے پروفیسر ہن ۔ 1986 وچ ، انھاں کوں امریکن فزیکل سوسائٹی ولوں تھیوریٹیکل پارٹیکل فزکس کیتے جے جے ساکورائی انعام ݙتا ڳیا ۔ 1989 وچ ، او فلم فیٹ مین اینڈ لٹل بوائے وچ مین ہٹن پروجیکٹ دے طبیعات دان رابرٹ سربیر دے طور تے ہک معمولی کردار وچ نظر آئے ۔ 2004 دا نوبل انعام برائے فزکس مشترکہ طور تے ڈیوڈ جے گراس ، ایچ ڈیوڈ پولٹزر تے فرینک ولزیک کوں "مضبوط تعامل دے نظریہ وچ ایسمپٹوٹک آزادی دی دریافت کیتے" ݙتا ڳیا ۔

پولٹزر طبیعات وچ نوبل انعام دے 20 امریکی وصول کنندگان وچوں ہک ہن جنھاں مئی 2008 وچ صدر جارج ڈبلیو بش کوں لکھے ڳئے ہک خط تے دستخط کیتے ، انھاں تے زور ݙیندے ہوئے جو "مالی سال 2008 اومنیبس اپروپریشنز بل وچ بنیادی سائنس دی پرکھ پرچول کوں پہنچݨ والے نقصان کوں الٹاؤ" محکمہ توانائی دے دفتر برائے سائنس ، نیشنل سائنس فاؤنڈیشن تے نیشنل انسٹیٹیوٹ آف سٹینڈرڈز اینڈ ٹیکنالوجی کیتے اضافی ہنگامی فنڈنگ دی درخواست کر کے ۔

پولٹزر کوں 2011 وچ امریکن اکیڈمی آف آرٹس اینڈ سائنسز دے رکن دے طور تے چݨا ڳیا ۔

پولٹزر بینجو وجیندے ہن تے انھاں ایں ساز دی طبیعات تے پرکھ پرچول کیتی ہے ۔

ٻیاں معلومات

پولٹزر 1980 دے ݙہاکے وچ پروفیسر پولٹزر اینڈ دی رو میسونز کیتے لیڈ ووکلسٹ ہن ، جنھاں اپݨا سنگل ، "دی سمپل ہارمونک آسیلیٹر" جاری کیتا ۔

پولٹزر دا ایرڈوس-بیکن نمبر 5 ہے – لورا ڈرن (کیون بیکن دے نال نووکین وچ) دے نال فیٹ مین اینڈ لٹل بوائے وچ نظر آوݨ تے سڈنی کولمین (ایرڈوس نمبر 2) دے نال ہک وار شائع کرݨ دے ذریعے ۔