ڈھیر ساریاں ڳالھیں وِسر ڳن

ڈھیر ساریاں ڳالھیں وِسر ڳن ، ٻڈھیپاآ ڳے ، ٻٹ کڑاک آلے میاں انیس دین پوری صاحب لکھدے ہَن ، ٻیٹھے ٻیٹھے ٻڈھیپا ولھیٹ ڳئے ، چالاکی ، چُستی تے چیٹ ڳئے۔ نکل ڳیا تیل جئیں ݙینہ دا کنے پا تیل ٻیٹھے ہوں ۔جو کجھ یاد اَمدے ، ٻول تے لکھوائی ویندوں ، ٻڈھیپے ءِچ ڈھیر سارے شئیں دا احساس تھیندے جو جوانی ءِچ اے چا کروں ہا تے او چا کروں ہا ، اَڄ نینگر اساں توں پُچھدن جو ویلے سر کم کرݨ کتنا چنگا ہوندے ۔ اَڄ اساݙے ٻال صوبے کیتے کتنے ٻاݨ مریندے ودن جیکر اے کم اساݙے وݙے ویلے نال کر ونڄن ہا ، نواب کالا باغ وݙا گورنر ہا ، گورمانی صاحب ، ٹوانے ، دولتانے سارے سرائیکی ہِن ۔ او صوبہ اوں ویلے بݨاون ہا کوئی ایجھی رکاوٹ وی نہ ہئی ۔ہُݨ تاں ݙئیݨیں وات پٹی ٻیٹھن ، صوبے دی مخالفت اینویں کریندن جیویں کوئی آزادی پیا منگدا ہووے ، مہر شکیل سئیں صوبے سانگے کم کریندن ، میݙے پُترمہر شکیل سئیں صوبے سانگے کم کریندن ، سرائیکی جماعتیں آلئیں دی مدت کریندن پا پیسہ ٻہوں ݙیندن۔ کرنل صاحب وݙا کم کیتے ، پر ݙو نمبر لوک دِھرتا کر گھندن تے مدت کرݨ آلے کوں تھکا ݙیندن ۔ وَل وی میݙے پُتر دی کوشش ہوندی اے جو کہیں کوں خالی نہ ولاوے ۔ سارے نینگر کٹھے تھی تے صوبے دی آواز چاون ،ݙیکھوں صوبہ ݙیندن یا کائناں؟۔مہر شکیل احمد شاکر سیال تے میݙے ٻئے پُتراں سانگے خدمات تریخ دا حصہ بݨ ڳن ، میں انہاں دے ایں جذبے تے خوش آں جو اپݨے صوبے واسطے تے اپݨی زبان واسطے اساں کم نہ کریسوں تے ٻیا کون کریسے؟

حوالہ

کتاب "قیس فریدی ۔ فن شخصیت اَتے شاعری "  ترتیب پیشکش  : مہر حامد علی شاکر سیال ، ناشر جھوک پبلشرز ، ملتان