ڈاکٹر عبدالسلام تے ہگز ذرے دی دریافت

4 جولائی 2012 کوں سرن جنیوا اچ لارج ہیڈران کولائیڈر مشین [LARGE HADRON COLLIDER]تے کم کرݨ والے سائنسدانیں پریس کانفرنس کر تے ہگز ذرے[HIGGS PARTICAL] (جیکوں گاڈ پارٹیکل دا ناں وی ݙتا ویندے) دی دریافت دا اعلان کیتا۔ ایں موقعے تے سب کنوں پہلے ہک وݙی ٹی وی سکرین تے ہگز نظریے دے خالق پروفیسر پیٹر ہگز[PETER HIGGS] دا چہرہ ݙکھایا ڳیا۔ انہیں دے اکھیں اچ خوشی دیاں ہنجھوں ہن اور او اے ڳالھ کریندے پئے ہن جو میݙی سب کنوں وݙی خوش قسمتی اے ہے جو میں اپݨے نظریے دی سچائی کوں اپݨی زندگی اچ ثابت تھیندے ہوئیں ݙیکھ گھدے۔

پاکستان دے نویکلے نوبل انعام یافتہ سائنسدان جݙاں 1957 اچ کیمبرج یونیورسٹی کنوں امپیرئیل کالج لندن اچ پروفیسر بݨ تے آئے تاں پروفیسر پیٹر ہگز انہیں دی نگرانی اچ کم کرݨ والے ݙوجھے پوسٹ ڈاکٹریٹ فیلو ہن۔

گاڈ پارٹیکل [GOD PARTICLE]ایٹم دے اندر پاتا ویندے۔ اے ہک ٻہوں ہی چھوٹا ذرہ اے جیندا وزن ہیڈروجن گیس دے ایٹم (جیڑھا کہ سب توں ہلکا ایٹم ہے) کنوں 130 گنا گھٹ اے۔

ساکوں اے پتہ اے جو ایٹم الیکٹران، نیوٹران تے پروٹان تے مشتمل ہوندے گاڈ پارٹیکل انہیں سارئیں  ذرات کوں کٹھا کر تے ہک ایٹم دی شکل اچ گھن اندے۔ اے ذرے ٻہوں زیادہ تیز رفتار ہوندن، گاڈ پارٹیکل انہیں دی رفتار کوں گھٹ کر تے آپ ݙو چھک گھندے تے اے ذرے ایٹم دا روپ دھار گھِندن۔

اگر گاڈ پارٹیکل نہ ہوندا تاں کائنات اچ مادے دا وجود نہ ہووے ہا۔ ستارے یا سیارے نہ ہوون ہا تے کائنات اچ صرف توانائی دیاں لہراں موجود ہوون ہا۔ گاڈ پارٹیکل ہیں کائنات اچ مادے دے وجود دا بنیادی سبب اے۔

پروفیسر پیٹر ہگز نے گاڈ پارٹیکل دے کم کوں ہک آسان مثال نال ݙسایا ہا جو اے ذرہ کہیں اہم پرکشش فلمی، سماجی یا سیاسی یا کرشماتی شخصیت والی کار ہوندے جیکوںݙیکھ تے لوک سبھو کم کار چھوڑ تے اوندے گرد کٹھے تھی ویندن۔ کوئی اوندے نال سیلفی بنڑویندے، کوئی آٹوگراف گھندے تے کوئی بندہ ہتھ ملاوݨ دی آرزو رکھیندے۔ گاڈ پارٹیکل دے گرد وی ایٹم دے ذرے اینویںجُھم تھی ویندن۔ 

ڈاکٹر سلام نے 1966 اچ ہگز ذرے دا ریاضیاتی ثبوت فراہم کیتا ہا۔ اگر اے ذرہ دریافت نہ تھیوے ہا تاں فزکس دا سٹینڈرڈ ماڈل بے سودہا ۔ ڈاکٹر سلام دا اے یقین ہا جو سائنس دا علم آفاقی اے، سائنس اسلامی، ہندو، عیسائی یا بدھسٹ نئیں بلکہ سائنس خدا دے قوانین دا مطالعہ اے اور ساری انسانیت دی مشترکہ میراث اے۔

ہگزبوسون دی دریافت نال اے ثابت تھیندے جو پاکستانی سائنسدان ڈاکٹر سلام 20 ویں صدی دے عظیم سائنسدانیں آئن سٹائن[EINSTEIN]، نیل بوہر[NEIL BOHR]، میکس پلانک[MAX PLANCK] ، ہانس بیتھ[HANS BATHE]، انریکو فرمی[ENRICO FERMI]، وولف گانگ پالی[WOLFGANG PAULI]، پال ڈائیراک [PAUL DIRAC]تے سٹیفن ہاکنگ[STEPHEN HAWKING] دے ہم پلہ عظیم سائنسدان ہن۔  

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان