ڈاکٹر شباب للّت

1933ء تا 2014ء

ڈاکٹر شباب للّت 3اگست1933ء کوں رام کرشن للّت دے گھر خان ڳڑھ ضلع مظفر ڳڑھ وچ پیدا تھئے۔آپ دا اصل ناں بھڳوان داس للّت ہا ۔ادبی حوالے نال آپ نے شاعری تے تحقیق و تنقید دیاں درجناں کتاباں تصنیف کیتیاں۔آخری عمر وچ اوہ معدے دے کینسر وچ مبتلا تھی ڳئے ہن ،تے ول 7فروری2014ء کوں شملہ(بھارت) اچ وفات پا ڳئے۔نمونہ کلام حاضر ہے۔

(1)غزل

آپے جو مہر بان ہو زہرہ جمال ہے

اے وی ضرور کوئی زمانے دی چال ہے

کولوں وی لنگھے ݙکھ کوئی اوندی مجال ہے

میں ہاں ،ہجر دی رات ہے،تیݙا خیال ہے

اوئیں کرو نہ غور تاں اے ڳالھ ہے ٻئی

معلوم ہے تہاکوں جو میݙے دل دا حال ہے

سارا سݨپ سوہنْے او پیسے دے نال ہے

اجٖکل اوہو سیاݨاں جیندے کول مال ہے

ݙینہ رات میݙی راکھی کریندی ہے مفلسی

شودی کوں میں نماݨے دا کیݙا خیال ہے

ہے ایندے وچ گُٖندھی ہوئی رت غریب دی

ڳلہاں تے ساہو کار دے جیڑھا غلال ہے

٭٭٭