ڈاکٹر راج کمار ملک نال ڳالھ مہاڑ

ٹِکٹاں گھنݨ دے بعد DTCدے ٹرمینل کنوں راج کمار ملک ساکوں اپݨے نال کِکّر سٹاپ کرول باغ گھن اَئے ۔ تلّے گݙی کھڑیونیں اَتے ݙو ترے منزلاں اُتّے اپݨے دفتر تئیں گھن ڳئے ۔ پوڑھیاں چڑھدیں میں تاں ہوک ڳیئم البتہ ظہور دھریجہ نواں نرویا ریہا ۔ فرید پیرزادہ وی تازہ دم ریہا ۔ اُنہاں آندے اِی دفتر وچ ٻہہ کے ٹیلی فون نال دکاندار کوں چار گلاس مِٹھّی لسّی دا آڈر ݙتّا اَتے کلرک کوں لسّی چا آوݨ دی ہدایت کیتی۔ ݙہ منٹ وچ لسّی آ ڳئی ٻہوں مزیدار ہئی ۔ لسّی پی کے دِل جاہی تھئی ۔ دماغ کوں سکون ملیا اَتے وَل لوک ادب کن چل سو چل ۔ اُنہاں اپݨے کمپیوٹر کوں آن کیتا اَتے اُوکوں لوک ادب کڈھݨ دی کمانڈ ݙتی۔ سرائیکی ادب اُنہاں دے سامھݨے ہا۔

لوک دُعائیں وچ اُنہاں ایہ نویاں دُعائیں سُݨایاں:

1:سِر دا سائیں جیوی

2:مارکنڈے (ہک دیوتا) دی آرزا (آشیرواد) ہووی

3:ٻچڑا جیوی

4:وسدے رہوو

5:ہسدے وسدے رہوو

5:خشیاں دے ݙینہ ݙیکھیں

لوک دُعائیں وچ اُنہاں کول کوسنے ‘پلوتے تے بد دُعاواں زیادہ ہَن ۔ کجھ بد دُعاواں ݙیکھو:

1لُڳ تھیوی

2رَنُّوں مارا

3کھلّے ڄیندی کوں

4ٻچڑے مرنیں پیئو دے

5نہ آوݨی پووی

6مُݨساں مُوئی

7سِکدی مریں

8مونہ کوں بھاہ لڳی

9غیب دی سَٹ پووی

10سِرمُنّا تھیویں(پیؤ مری)

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان