ڈاکٹر بے تاب علی پوری

1932ء تا 2012ء

بے تاب علی پوری دا اصل ناں ڈاکٹر راما نند ہا ، جو 17مارچ1932ء کوں علی پور مظفر ڳڑھ وچ پیدا تھئے،شہید علی پوری دے شاگرد ہن۔’’رامش ورنگ‘‘ تے ’’بچوں کا گلدستہ‘‘انہاں دیاں مطبوعہ کتب ہن۔ڈاکٹر بے تاب علی پوری 12اپریل2012ء کوں دلّی اچ وفات پا ڳئے۔نمونہ کلام۔

غزل

آؤ وے یارو لوک لوکائی

ڄلوں سارے دِڳا چائی

ہاں وچ ساریاں ہاں ملوائی

سچّی ڳالھ نہ کہیں سمجھائی

دل کوں وݙا کرݨا پوندے

مل ٻَہوَݨ وچ خوب وݙائی

ڳالھیں دے ہن سارے مکھی

رہندن ڳالھیں وچ ٹرخائی

اَٹّا مل پر لُݙدی کیوں ہیں

من ناپاک تے حجتاں کائی

کالے دھاڳے کجھ نہ کیتا

آخر اساں مرچ وتائی

گھر بھر ݙیؤ بھانویں بیتابؔ

خوش نی تھیندے پر ڄنوائی

٭٭٭