ڈان میڈیا گروپ

1948ء وچ بانی پاکستان اتے پہلے گورنر جنرل پاکستان قائداعظم محمد علی جناح دی وفات دے بعد روزنامہ ڈان دی ملکیت تے قانونی تنازع دے نتیجے وچ کمپنی پاکستان ہیرالڈ پبلی کیشنز قائم کیتی ڳئی۔ قائد اعظم دی بھیݨ فاطمہ جناح، انہاں دی سیاسی جماعت مسلم لیگ اتے حکومت پاکستان تمام نے اخبار دی ملکیت دا دعویٰ کر ݙتا جݙݨ کہ وارثین وچ حاجی عبداللہ ہارون شامل ہن جنہاں نے ایں اخبار کوں چلاوݨ آلے ٹرسٹ وچ سب توں زیادہ سرمایہ کاری کیتی، جناح دی وفات دے بعد تنازع شدت اختیار کر ڳیا تاں حاجی عبداللہ ہارون دی فیملی نے روزنامہ ڈان دی اشاعت روکݨ دا فیصلہ کر ڳھدا، انہاں نے پاکستان ہیرالڈ پبلی کیشنز پرائیویٹ لمیٹڈ قائم کیتی اتے ہک ٻیا اخبار روزنامہ ہیرالڈ شروع کیتا۔ آخر کار جݙݨ یکم اپریل 1950ء کوں روزنامہ ڈان شائع نہ تھیا تاں پاکستانی عوام اتے اخبار ویچݨ آلیاں نے ایندی بندش تے شدید غم اتے غصے دا اظہار کیتا کیوں کہ اے اخبار انہاں دے سب توں پیارے رہنما جناح دا ہئی، ایں کیتے انہاں نے ہیرالڈ دی خرید و فروخت دا بائیکاٹ کر ݙتا جیں دی وجہ توں حاجی عبداللہ ہارون دی فیملی اونکوں روکݨ تے مجبور تھی ڳئی اتے چار ݙینہہ دے بعد پاکستان ہیرالڈ پبلی کیشنز پرائیویٹ لمیٹڈ دے پرچم تلے روزنامہ ڈان دی ولا اشاعت شروع کر ݙتی۔ اڄ پاکستان ہیرالڈ پبلی کیشنز پرائیویٹ لمیٹڈ کراچی وچ قائم ہک نجی کاروباری ڈان میڈیا گروپ دا حصہ ہے جیہڑا حاجی عبداللہ ہارون دی پوہتری امبر ہارون سہگل دی فیملی دی ملکیت ہے۔ اے گروپ گذشتہ ستر سال توں روزنامہ ڈان سمیت اخبارات اتے میگزین شائع کریندا پیا ہے، 2000ء دے وسط توں اے گروپ ڈان نیوز چینل اتے ہک انگریزی زبان دی ویب گاہ ڈان ڈاٹ کام وی چلویندا پیا ہے۔