ڈارک انرجی

کائنات دے پھیلاؤ دا مطالعہ کرݨ واسطے 1998 اچ کجھ تجربات کیتے ڳئے ہن۔ ہنیں تجربات کنوں پتہ لڳیا جو کائنات دا سب کنوں دور سپرنووا کجھ زیادہ مدھم ہا۔ ایندا مطلب اے ہا جو تارے اْنہیں فاصلئیں کنوں ٻہوں زیادہ پرے ہن جنہیں دا اندازہ کیتا ڳیا ہا۔ ایں ڳالھ نے سائنسدانیں کوںٻہوں پریشان کر ݙتا، کیونکہ اے سمجھیا ویندا ہا جو کشش ثقل (کائنات دے ݙو جِسمیں دے درمیان کشش دی قوت) صرف کشش دی قوت ہے چونکہ ستارے پرھے کنوں پرھے تھیندے ویندن۔ ایں سانگوں اے کشش کم کنوں کم تھیندی ویندی ہے تہوں کائنات دا پھیلاؤ وی گھٹ کنوں گھٹ ہوونڑاں چاہیدا ہے۔ سپرنووا دا مدھم تھیوݨ ایں ڳالھ دا ثبوت ہا جو کائنات دے پھیلاؤ دی رفتار گھٹ تھیوݨ دی بجائے ودھدی پئی ہے۔ 1998 دے تجربات دے بعد اے پتہ لڳاجوکائنات دی ہر کہکشاں ٻہوں تیزی نال پرہے بھڄدی ویندی ہے تے ہیندی رفتار اچ وقت دے نال نال ودھارا تھیندا پے۔ ایں ڳالھ کوں ݙہدئیں ہوئیں سائنسدان ایں نتیجے تے پُڄیئے جو کائنات اچ ہک خاص قسم دی توانائی موجود ہے جیڑھی طاقت اچ ٻہوں زیادہ ہے۔ ایہا او توانائی ہے جیڑھی کائنات دے ہر جسم کوں ٻاہر ݙوپرھے بھڄائی ویندی اے۔ ایں توانائی کوں سائنسدانیں ڈارک انرجی DARK ENERGY دا ناں ݙتے۔ حالی تک اے ہک مفروضہ ہے لیکن ڈھیر سارے سائنسی تصورات ایندے حق اچ گواہی ݙیندن۔

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان