ڈائیوو دی ملتان توں لہور دی بکنگ اَتے سفر
17؍اگست کوں ظہور دھریجہ ڈائیوو ملتان توں لہور کیتے اَٹھ ٹکٹ بُک کرائے۔ ݙو سنگتیاں لہوروں ساݙے نال رَلݨاں ہا ۔ (سئیں فرید پیرزادہ +مجاہد بھٹی)۔ ڈیلیگیٹ دے ترے بندیاں کراچی توں ملتان آ کے ساݙے نال رَلݨاں ہا۔ ایہ ترے سنگتی طاہر محمود دھریجہ ‘ بیگم طاہر محمود دھریجہ تے راشد مصطفیٰ خان ہَن ۔ کراچی دا ایہ گروپ 18؍اگست کوں اپݨی کار دے ذریعے ملتان پُڄ ڳیا اَتے ایں گروپ کار دے ذریعے اِی لہور ونڄݨ دا پروگرام بݨایا ۔ اِیں ہی ݙینہوار جمشید دھریجہ خان پور توں ملتان پُڄ ڳیا۔
19؍اگست کوں ٻدھ دے ݙینہ ‘ باقی دے پنج سیلانی مونڈھیاں اُتّے مݙی موڑھا چاتی سویلے ساݙھے اَٹھ وڄے ڈائیوو ٹرمینل ملتان اَن لتھّے۔ ٹکٹ مُل گھدّے۔ سمان بُک کرایا تے ٹھیک نئوں وڄے بس لہور کیتے ٹُر پئی ۔ اُوں ݙینہ ملتان دا موسم ٻہوں سوہݨاںہا۔ رات کوں مینہ دا ہک زور دار حملہ تھیا ہا تہوں سویلے موسم ٹھڈّا ہا ۔ سڑکاں اُتّے رات دے مینہ دے نشان نشابر ہَن ۔ لہور تئیں موسم اینویں اِی ٹھڈا ریہا ۔ لہور کن اَڄ دے قافلے وچ میݙے علاوہ ظہور دھریجہ ‘ عابد سیال ‘ جمشید دھریجہ تے موہن بھگت شامل ہَن۔
ڈیلیگیٹ بݨاوݨ ویلے خیال ہا جو ایندے وچ شاعر ‘ ادیب ‘ گلوکار ‘ دانشور (سبھّے میل) شامل ہووِن۔ مرد وی ہووِن تے تریمتیں وی ۔ بھانویں جو ڈیلیگیٹ مکمل طور تے اونویں نہ ہا جیویں چاہیدا ہا پر ایندے وچ موہن بھگت جیہاں گلوکار ‘ ہک تریمت ‘ ݙو ترے دانشور ‘ ݙو صحافی تے کالم نگار شامل ہَن ۔ مسلمان وی ہَن تے ہک ہندو وی۔
اساں 2:30ݙوپہراں ویلے لہور پُڄ ڳیوسے ۔ پتہ لڳا جو اُنّوں کراچی دے سنگتی وی لہور کیتے ݙو وڄے ملتانوں ٹُر پئین ۔ اوہ رات کوں لہور پُڄ ڳئے اَتے اَپݨے ہک سنگتی دے گھر ونڄ ٹِکّے۔ میݙا خیال ہا جو لہور ڈائیوو ٹرمینل تے سئیں فرید پیرزادہ موجود ہوسِن پر اُنہاں دا پَرے پَرے تئیں کُئی نشان پتہ نہ ہا۔ رستے وچ کئی واری اُنہاں نال موبائل تے رابطہ کیتا ڳیا ہا پر اُنہاں دا موبائل بند ملیا ہا۔ بَرحال اَساں ہک ٹیکسی بُک کیتی ۔ ٹیشݨ دے کول ہوٹل پارک دے وچ سمان رکھیا اَتے اُتھوں جھوک لہور دے بیورو چیف میاں اسلم کول چوک صفّاں آلے ونڄ پہنتوسے۔ اُتھاں ساݙے کیتے کھاݨاں تیار ہا ۔ کھاݨاں کھا کے چاہ دا دور چلیا ۔ جھوک لہور دا بیورو چیف میاں اسلم ٻہوں مِٹّھا تے من موہݨاں انسان ہے ۔ اوہ رسالہ گارڈ دا ایڈیٹر ہے ۔ ہک ݙینہ وار اخبار کڈھیندے۔ ہک ݙو ٻئے پرچے وی اُتھوں نِکلدن۔ اوندا دفتر ممھاناں کیتے ہر ویلے کُھلا ہے ۔ اوندا ملازم چنڳاں بورچی ہے ۔ کھاݨاں ایݙا چنڳاں پکیندے جو کھا کے چس آ ویندی ہے ۔ ایں لحظے وچ ریاض باکھری وی آ ڳیا ۔ اوندے آوݨ نال مجلس ڄم ڳئی اَتے ریاض باکھری اپݨاں تازہ کلام سُݨایا۔ ریاض باکھری ہک انقلابی شاعر ہے ۔ کوٹ ادّو نال تعلق رکھدے ۔ لہور اِچ فروٹ دا کھوکھا لا کے روزی کماندا پئے ۔ اوندا ہک بھرا‘ اے ‘ٹی ۔وی وچ تے ݙوجھا اخبار وچ ملازم ہے ۔
ملتان توں لہور آوݨ دے سارے رستے دلّی وچ ڈاکٹر بترا تے ڈاکٹر راج کمار ملک نال رابطہ ریہا۔ ملتان توں ٹُرݨ ویلے ساریاں سنگتیاں طے کر گھدّا ہا جو ساݙے ہندوستان دے وزٹ دے اڳواݨ تے موہری ظہور دھریجہ ہوسن ۔ تہوں لہور وچ ظہور دھریجہ ٹیکسی دا انتظام کیتا ۔ دِلّی وچ سڄݨاں تے خاطر داراں نال رابطہ رکھیا ۔ اُنہاں دا پہلے تاں خیال ہا جو دِلّی وچ کُئی ہوٹل بُک کرایا ونڄے ۔ ڈاکٹر راج کمار ملک پُچھیا جو دِلّی دی جامعہ ملّیہ دا ممھان خانہ بُک کرایا ونڄے یا کُئی ہوٹل بُک کرایا ونڄے ۔ سئیں ظہور دھریجہ صلاح ݙتی جو جہڑی جاء تُساں مناسب سمجھو ساݙے کیتے بُک کرا ݙئیو۔ بعد اِچ اُنھاں صلاح ݙتی جو ہک جاء بہاول پور بھون (بہاول پور محل) وی ہے۔ ایہ ہک اِہجاں مرکز ہے جہڑا بہاول پوردے لوکاں دی فلاح کیتے بݨایا ڳے ۔اِتھّاں تُساں کرایہ ݙیوݨ توں وی بچ ویسو ۔ سئیں ظہور دھریجہ آکھیا جو بہاول پور بھون بہتر رہسی کیوں جو اساں لوکاں نال رَل کے رہوݨ چاہندے ہَیں تے اساں زیادہ کنوں زیادہ اپݨے سرائیکی بھراواں نال ملاقی تھیوݨ دی سِک رکھدے ہَیں۔ برحال فینصلہ ڈاکٹر راج کمار ملک تے چھوڑ ݙتا ڳیا ۔ بعد وچ پتہ لڳا جو اُنہاں وی بہاول پور بھون کوں ترجیح ݙتّی ہے۔
حوالہ
[لکھو | ماخذ وچ تبدیلی کرو]کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان