ڈائری دا ہک پنا : 8

ڈائری دا ہک پنا : 8، डाली दा पन्ना ८

ملتان ٹی ہاؤس دے باہروں بارش وچ شمیم عارف قریشی دا چھیکڑی مسکدا چہرہ یاد ہے ' دوستاں دے آکھنڑ دے باوجود نماز جنازہ پِچھوں میں انہاں دا منہ نہ ڈٹھا ' میڈے نال اُنہاں دے انڑ گنڑت مہاندرے ہِن ' چالیہ ورہیاں دی سنگت دے مہاندرے ' ملتان توں رحیم یار خان , درابن(دیرہ اسماعیل خان) , کروڑ لال عیسنڑ ' اسلام آباد دے نال نال سرائیکی وسوں وچ وستی در وستی گوٹھ در گوٹھ شہر در شہر سنگت دا پندھ جیڑھا "سویل" تے "خمیس یاترا" نانویں کِھنڈیا ہوئے جیڑھا دوستاں کٹھے ذاتی ملاقاتاں نال گنڈھیا ہوئے شمیم عارف قریشی دے مُکھ مہاندرے دا درشن اے ' سرائیکی شاعری, کلچر تے سیاست ناویں ایہ یاترا ساڈی روز ڈہاڑی دی وہیند ہئی, " سویل " طرفوں شاہ شمس سرکار دیاں پوڑیاں وچ " منوتی " دا پروگرام ہئی ' خلق خدا دی واہند وچ شبیر حسن اختر دی رزمیہ نظم " ملوہیا.... سدا سہاگنڑ" بارے گالھ مہاڑ ہئی ' محبوب تابش تے اوندے سنگتیاں خلق تماشا کرنڑا ہا ' صابر چشتی غضنفر عباس سارے اہر پُگا چکے ہَن ' سارے جہان وچ خبراں ہَن ' سویر نال گھر نا معلوم فون آونڑ لگ پئے جو ایں پروگرام دی اجازت نہ ڈتی ویسی تساں خود ذمہ دار ہوسوں 'اِنہاں فوناں وچ مناہی دے نال نال دھمکی وی موجود ہئی 'شمیم صاحب اپنڑی جیپ تے میڈے گھر پُجے ' جیپ وچ منوتی کیتے گلاب دے پھل لڈیل ہَن ' اُنہاں کوں فوناں بارے ڈسیم ' اُنہاں اپنڑا خاص قہقہہ لایا تے آکھیا سرکار ایہ فون میکوں وی آندے پِن ' تساں جیپ وچ باہوو ' جے سرائیکی کیتے ڈھکیندے ہیں تاں ایں توں وڈی برکت کیا ہے

रिफ़ात अब्बास, رفعت عباس