ڈائری دا پنا : 18
ڈائری دا پنا : 18 , डाली दा पन्ना १८
رات اساں ننگر پارکر دے اسمان تلے ہاسے ' ممتاز سموں دے گھر دا کُھلا ویڑھا ' وساکھ دا پہلا سَتواڑا تے جَو دے پانڑی وچ پنج فی صد الکحل دا جہان تے چار چفیروں دنیا دا عجائب ہک شہر جیڑھا ہمیشہ کیتے ہک شاعر دے خابیں دا حصہ پیا بنڑدا ہا ' اج ڈینہیں ننگر پارکر آندیاں روپلو کوہلی موٹل دے ہال وچوں پہلے خلیل کنبھار تیں وت شوکت ہنگورجو فون تے کہیں دوست نال گالھ کیتی وت مینیجر نال گالھ کرائی تے آکھیا اساں ڈو ڈینہوار اتھاہیں پئے ٹِکدے ہیں اتھاہیں رات گزریسوں ' ننگر پارکر دے مانڑ تے سندھڑی دے سورما روپلو کوہلی دے ناں تے ایہ شاندار موٹل ہک حیرت دی گھڑت ہئی ' ڈوہیئں دوستیں میکوں فیصلے دا مانڑ ڈتا "اساں رات ننگر پارکر شہر وچ سمسوں , ننگر پارکر دیاں گلیاں وچ جاگسوں "..... ' ایں ویلے اساں کارونجھر دی یاترا پِچھوں ممتاز سموں دے گھر ہاسے ' گھر دا بوہا ننگر پارکر دی گلی وچ پیا کُھلدا ہا ' ایہ گلی سِدھی کارونجھر پئی ویندی ہئی۔ رفعت عباس (रफ़ात अब्बास)