ڈائری دا پنا 55
ڈائری دا پنا : 55
امر کوٹ آ گیا ہا ' ترے ڈینہ پہلے اِتھوں ٹُردیاں میکوں کیڑھی خبر ہئی جو واپسی تے ایڈیاں جاہیں لوک تے محبتی میڈے کٹھے ہوسن ' میکوں کیڑھی ڈَس ہئی جو ایڈیاں ساریاں نویں شئیں نال میڈے ٹُر پوسن ' کار وچوں لتھم تاں ہک وڈا جلوس میڈے نال ہا ' ایہ سبھ ہمیشاں کیتے میڈی سنگت وچ رَل آئے ہَن ' میں انہاں کوں اپنڑی بے انت خوشی وچوں سُنجانڑیا ' ایہ بہوں سارے ہَن ' کاسبو دے جبل دی ساری نقش نگاری ہئی ' کاسبو دے موریں دے کنبے ہَن خود راما پیر ہئی ' اسلام کوٹ دیاں نِماں ہَن ' بُگھار دی جنگل جلیبی ہئی ' مِٹھی شہر دا فرسا رام اگوں اگوں رکشہ چلیندا ہا ' کانٹیو دی بیر ہئی..... ' ایہ سارے اپنڑی " میں " وچوں خوش حال ہَن ' ایہ سارے " میں " تے " اساں " دے وچکار نویں ہک معاہدے کیتے وَگ پئے ہَن '......ہک پھیریں وت خلیل کنبھار دے ساوے لان والے گھر وچ آ گئے ہاسے ' خلیل کنبھار دی پولیس دی نوکری دیاں چُھٹیاں مُک گیاں ہَن ' امر کوٹ دا پانڑی مِٹھا تے تازہ ہا ' اج 20 اپریل 2018 دی تازگی وچوں کپڑے بدلائے ' چا دا ہک کپ پیتا ' خلیل نزار قبانی دی آپ بیتی دا اردو ترجمہ میکوں ڈتا " ایہ تیرے لیے " بیگ چاتم میڈے نال اوہو جلوس ہا جیڑھا وجودی کہیں وحدت وچوں باہر پیا ٹُردا ہا گھروں نِکھتم ' ہک سوزوکی مہران تیار اگوں کھڑی ہئی پچھلی سیٹ تے بیگ اپنڑا سانبھیم ' خلیل دفتر اپنڑے وَنجنڑا ہا اوہ امر کوٹ پیا رُکدا ہا تیرا دوپہر کا کھانا بھائی حیدر آباد اسحاق سمیجو کے پاس ہے ' وہ انتظار میں ہے " ایہ رومان کوں جَھلنڑ دا ویلا ہا موٹر وچ بیہ تھیم۔ رفعت عباس