ڈائری دا پنا 53

ڈائری دا پنا : 53

کانٹیو ہک نکا جِہا شہر ہا ' اِتھاں "ہک" دے "ڈو" تھیونڑ دا میلہ ہا ' ,ڈو دے دریہ تھیونڑ دا درشن ہا 'اٹھارہ ویہ ہزار آبادی دا ایہ شہر رستے وچ آگیا ہا ' سڑک تے معمول دیاں ہٹیاں تے چاء دے ڈھابے ہَن ' سڑک توں لنگھدیاں نہ لگدا ہا جو اِتھاں انسانی حیاتی دیاں ایڈیاں ڈِکھالیاں ہَن ' مسلمانیں تے ہندؤیں دے رَلانویں ایں قصبے ساکوں تھوڑی دیر جھلیا ہا ' اِتھاں مندر ہَن مسیتاں ہَن کپڑیاں دیاں جُتیاں دیاں مٹھائیاں دیاں بوتلاں دیاں کریانے دیاں درزیاں دیاں نائیاں دیاں ہٹیاں ہَن ' ڈینہ چنگا بھلا چڑھ آیا ہا تے لوک امر حیاتی دی کہیں پَٹی تے پئے ٹردے ہَن ' ایہ دنیا ایں روز دی بے رنگی نال اپنڑے لباس دے رنگیں وچوں پئی لڑدی ہئی ' اِتھاں لوکیں دی ٹور وچ اُنہاں دے کپڑیاں دے رنگ مدد پئے کریندےہَن ' کانٹیو دے بزار وچ مَردیں دے پٹکے تے تریمتیں دیاں چُنیاں کائنات دی ایں نُکڑ دا رزمیہ ہَن ' اِتھوں ترے چار کلومیٹر اُتر دوں چھاچھڑو روڈ تے چندو پیر دا مندر ہا ' چندو پیر یا ڈاڈا چندل پیر میگھواڑیں دے پِتھورو پیر دا اُتار ہا ' اِتھاہیں 'جزو' وچوں 'کُل' نہ پیا جُڑدا ہا بھلکہ 'ہک' وچوں 'ڈو' پیا نِسردا ہا جیڑھا ہندؤاں دا پتھورو پیر ہا اوہ مسلمانان دا مخدوم نعمت اللہ ہا ' بہاؤالدین زکریا دی برکت وچوں گنڈھل ہک بزرگ ' اندر چار قبراں یا سمادھیاں ہَن ' ایں مندر یا خنگاہ دا میلہ ہندو تے مسلمان ڈوہیں رَل منیندے ہَن ' اوہ میلے دے ڈینہاں وچ رل مِل پکوان بنڑیندے تے کھاندے ہَن ' ایہ وحدت الوجود دی ماڑی توں باہر 'ہک' وچوں 'ڈو' دا میلہ ہا ' ایہ مرکزی دروازے توں باہر تل جایاں دا پڑاؤ ہا ' کانٹیو وچ کرشنا دا مندر ہا جِتھاں اوندی رادھا ہئی ' اِتھاں اوہو رام تے اوہو رحیم نہ ہا ' ڈوہیں دا اپنڑا اپنڑا سماجی سوہنڑپ ہا ' کانٹیو وچ رحیم کوں رام تے رام کوں رحیم بناونڑ دا کوئی اہر نہ ہا ' اتھاں بہوں ساری گنجائش ہئی ' ایہا وجہ ہے جو اتھاں ڈوہیں دا سانجھا ہک میلہ ہا ڈوہیں رل کے مانی کھا سگدے ہَن ' ایہا جیونڑ دی گنجائش ہے ' ایہو سماجی تے سیاسی اعتبار ہے ' اج توں 35 سال پہلے ہک پنجابی دانشور مرحوم رشید الزماں میکوں بہاولپور اپنڑے گھر وچ آکھیا ہا جو اگر تساں سرائیکی کوں پنجابی دا لہجہ نی منیندے تاں پنجابی کوں سرائیکی دا لہجہ من گھنو جو ایکتا ضروری ہے ' کانٹیو وچ ایں طرح دی ایکتا دا چلن نہ ہا ' اتھاں سبھ دی اپنڑی اپنڑی منوتی ہئی جیڑھی کثرت دا میلہ ہا ' کانٹیو وچ مسیتاں ہَن جتھاں پنج بانگاں ملدیاں ہَن تے لوک نماز کیتے ویندے ہَن ' کانٹیو دے مندراں وچ شام سویل ٹلیاں وجدیاں ہَن تے لوک پراتھنا کریندے ہَن ' ایں ویلے ایہ میڈے کیتے دنیا دا سبھ توں قریبی شہر ہا ' جیندیاں میں گلیاں وچ ٹردیں ٹردیں رُک سگدا ہم ول ٹُر سگدا ہم ' مسیت کوں ہتھ لا کے ڈیکھ سگدا ہم ' مندر نال کنڈ لا کے کھڑ سگدا ہم ' نِم تے بیٹھے مور دوں اشارہ کر سگدا ہم ' جتھاں پانڑی دی ہک بوتل میں پی سگدا ہم ' کانٹیو دے ہک جنرل سٹور دیاں پوڑیاں نال کھڑ کے اوں دوست دی فون کال گِھن سگدا ہم جیڑھا سارے پندھ وچ میڈے نال ہا۔ رفعت عباس