ڈائری دا پنا 49

ڈائری دا پنا : 49

مِٹھی شہر 'اساں' دے میلے وچ 'میں' دا چمکارا ہا ' میں جینکوں داپھیا گئے....' میں' جینکوں جیونڑ دا کالا ٹِکا جانڑیا گئے....'میں' کولوں ہٹکیا گئے ' اساں دی بکل ڈے کراہیں اینکوں ' تو' دے سپرد کیتا گئے' تصوف ہووے بھانویں ویدانتا بندے وچوں ' میں ' کوں کڈھن دا اہر اے ' سندھ وادی توں وی اگونہاں برصغیر وچ مَنڑس کوں اوندی ' میں' کھس کے ماریا گئے ' اونکوں ان ڈٹھے کُل نال گنڈھیا گئے ' دور راجدھانی دا حاکم ہووے یا آسمانی دیوتا اوندی 'میں' دا وارث ہے ' سبھ ماہنڑو دی 'میں' دی بَلی منگدن ' سبھ ماہنڑو دی ' میں ' کوں بھنیٹ چڑھیندن ' ہک کوں ڈو کرنڑ دی موکل کینھی ' جیڑھا ہک کوں ڈو کر جانڑے اوہ کافر مشرک ہے ' حاکم دوئی توں ڈردے ادارے دوئی توں تراہندن ' میں ہاں ڈوجھا وی ہے تریجھا وی ہے دی ہکل لوکیں دی بادشاہی ہِے ' ایہا ہکل بغاوت ہے ' ایں دوئی دی ہکل اگوں تلوار ہے بندوق ہے ٹینک ہے ' ایندے اگوں مدرسہ / سکول ہے پولیس ہے فوج ہے سرکاری وقت ہے ڈی سی ہے کچہری ہے ہسپتال ہے پاگل خانہ ہے ' اوں تے عہد در عہد چڑھائی ہے ' حاکم کوں بس ہکو پوسٹر لوڑیندے جو سبھ ہک ہے سبھ اکھنڈ اے سبھ اٹوٹ اے ' ایہا رمز اے جو ایں دھرتی دے جانڑونداں چنبے دی بوٹی اپنڑے اندر لائی ہے ' ایں بوٹی اندر ہی مُشک مچائے اندر ہی پُھل چاتن ' ایہا ہی نیک کمائی ہے ' چنبا باہر لاونڑ دی ہٹک ہے ' ایہ چنبا باہر لگ پووے تاں ایں تے ' میں' دے پُھل لاہندن ' ایں خطے وچ 'میں' دے پُھل لاونڑ چاونڑ ونڈاونڑ دی مناہی اے ' تہاڈے کول جو کجھ وی ہے تساں سپرد کرنے ' ایں دھرتی دے ماہنڑو کوں بس اپنڑی سپردگی دی ذمہ داری چاونڑی ہے ' ایہا سکھشا ہے ایہا تعلیم ہے ' ایہو دھرم ہے ایہو مزہب ہے ' ایہا راج نیتی ہے ایہا سیاست ہے ' ایہو دلی / اسلام آباد ہے ایہو لندن / واشنگٹن ہے 'مغرب اپنڑیاں کالونیاں وچ ' میں ' دا شکار کریندے ' اوہ بندوق نال میں کوں چُٹیندے پر برصغیر وچ اونکوں ادھ موئی ' میں ' کوں مارنڑ دی لوڑ ای نئیں پئی ' لندن دی ' میں 'تگڑی تھیندی ہے وت ایہا واشنگنٹن دی میں بنڑ ویندی ہے ' ایں واشنگٹن دی ' میں ' اگوں ساڈیاں راجدھانیاں دی ' میں ' کُسکدی ہے : میں ناہیں سبھ توں ہک لاہندی چڑھدی سڑک ہئی ' ڈو سال توں بارش نہ تھئی ہئی ' کہیں کہیں ویلے ریت سڑکاں تے ٹُر پوندی ہئی ' مور اپنڑے کُنبیاں نال نظردے ہَن ' کُنبٹ دے درختاں دیاں سُکیاں چھتریاں بارش پیاں منگدیاں ہَن ' ایندا سُک ونجنڑ ایندی ' میں ' ہئی جیڑھا پہلی بارش نال ساوا تھی آندے ' روہیڑے دی ' میں ' رتے پُھلیں نال لڈیل ہئی ' صحرا ' میں ' کوں ونجیندے پر جیا جون / حیاتی 'میں ' ہے ' مٹھی شہر تھر پارکر وچ ہک جیندی جاگدی ' میں ' نال موجود ہا ' ایہو ساڈا لوک تصوف ہے' ساری جیا جون دی رَکھ ' خلیل کنبھار مٹھی توں ٹُردیاں عابدہ پروین دی سی ڈی لائی ہئی ' اوں اَلا گھٹ کیتا " کیا دھیان میں گُم ہو چلہار آ گیا "۔ رفعت عباس