ڈائری دا پنا 42

ڈائری دا پنا : 42

دوستیں نال دعا خیر تے کیفے تھر توں واپس شہر دوں روانہ ' شام گھاٹی تھی آئی ہئی ' مٹھی دے درخت پکھی پہارو تھر دی بُکل وچ لُک گئے ہَن ' مٹھی دیاں سڑکاں گلیاں تے گھراں وچ لیمپ بَل گئے ہَن ' ڈاہ منٹ دے پندھ پچھوں کار وڈی ہک سڑک توں محلے دی سڑکی تے لَتھی ' ایہ فقیر محلہ ہا ' تھر دے راگیاں موسیقاراں دا جہان ' نویں خوش رنگ گھر ' چوباریاں دیاں بکھدیاں تاکڑیاں ' سڑکی تے لوکیں دی آ وَنج جاری ہئی " ایہ مائی بھاگی دا گھر ہے " خلیل بولیا ,اوہ ڈیپلو دی جَم پرنیج کے ایں محلے وچ آئی ہئی :

کھڑی نیم کے نیچے مائی بھاگی , تھر دا سرمدی گیت تھر دا انہد واجا جیں پورا جہان موہ گھدا ' مٹھی دی رات دے پہلے پہر وچ مائی بھاگی دے ناں سانگے آسمان دے ان کُھٹ تارے ٹلیاں وانگوں وَج پئے ' جے چندر وی نکھتا ہوندا تاں ایں گھڑی عجیب تماشا بنڑ ونجے ہا ' اساں بیجل دے ہکتارے دے کُٹھے لوکیں پاروں مائی بھاگی دا ناں حیاتی دا اوہ بھیت ہا جیڑھا اج ڈہاڑے 19 اپریل 2018 کوں مٹھی دے فقیر محلے وچ کُھلیا ' تھر دے ایں جادوئی شہر مٹھی ہک پاندھی تے اپنڑا بوہا کھول ڈتا ' چار گھنٹے پہلے جڈاں میں ایں شہر وچ لتھا ہم ایندے بوہے بند ہَن ' میں اپنڑی ہوشیاری وچوں حیرت دیاں تمام کَلاں ورتیاں پر مِٹھی دا در نہ کُھلیا ہا ' ایں گھڑی مائی بھاگی دے ناں دی برکت وچوں مٹھی دی سُونہہ لدھی ' ہک گھر اگوں رُک گئے ہاسے ' ایہ تھر دے راگی صادق فقیر دا گھر ہا ' سکھر توں حیدر آباد آندیاں خلیل کنبھار ول ول صادق فقیر دا ذکر کیتا تاں پُچھیا ہم ملاقات تھیسی صادق فقیر نال " خلیل کنبھار دی دھاڑ نکھتی اوہ روونڑ لگ پیا ہا ' علی دوست عاجز دیاں اکھیں وچ ہنجو تر آئے ہَن ' کار وچ چُپ تھی گئی ہئی وہ دو سال پہلے چلا گیا......" خلیل کنبھار ڈُسکیا ہا ' گاڈی صادق فقیر دے گھر اگوں رُک گئی ہئی ' اوندا پُتر اجوکے تھر دا گائیک نزاکت صادق فقیر ساڈے نال ہا ' ایہ ڈو منزلہ سوہنڑا گھر ہا ' اساں پوڑیاں چڑھے ' مٹھی دے طلسماتی آکاش تلے چاندڑیاں تے رلیاں وِچھل ہَن جتھاں صادق فقیر دے ذکر وچوں رات دی اساں مانی کھادی۔ رفعت عباس