ڈائری دا پنا 41

ڈائری دا پنا : 41

کیفے تھر وچ دوست کٹھے ہَن ' مٹھی توں باہر وڈی سڑک تے خلیل کنبھار دے پیارے پیارو شوانی دا ریستوران اے ' تھر دی تہزیب تے ثقافت وچ رنگیے ایں ریستوران وچ ملتانوں آئے ہک شاعر پاروں مٹھی دے شاعر ادیب دانشور استاد صحافی تے بہوں سارے سوہنڑے لوک کٹھے ہَن ' خلیل سکھر توں ٹردیاں ہی ایں میل دا سربندھ کر گھدا ہا ' کیفے تھر تیں دیگر پئی لاہندی ہئی ' دوستاں نال جانڑ سنجانڑ تھئی ' رَل چائے پیتی ' سٹیج تے لگیل پینا فلیکس تیں ہک سرائیکی شاعر دا آدر تصویر تیں گالھ مہاڑ دا عنوان لکھیا ہا " نویں سرائیکی شاعری تے تصوف " ایں تصوف دی دھرتی سندھڑی وچ میڈے کیتے بہوں اوکھا ہا جو تصوف تے الواواں ' سکھر توں حیدر آباد آندیاں کار وچ خلیل کنبھار , علی دوست عاجز, اسحق سمیجو تے شوکت ہنگورجو نال تصوف تے بہوں درگھی گالہیں تھیاں ہَن ' ایہے گالہیں کریندے اساں بھٹ شاہ حضرت عبداللطیف بھٹائی سائیں دی حاضری وچ ونج پجے ہاسے ' خلیل دے دھیان وچ اوہے گالہیں ہَن ' اوندا خیال ہا جو ایہ گالہیں تھر دے دوستیں نال وی سانجھیاں کریجن ' اوں پیارو شوانی نال پروگرام سِتر گھدا ہا ' میکوں کل ننگر پارکر وچ ڈسیا ہا جو ایں موضوع تے تیں الواونڑے ' بس مسکین دے سر تے ایہ اوکھی گھڑی آ گئی ہئی ' خلیل کنبھار موہری گالھ مہاڑ کیتی تے سٹیج تیں میڈے کیتے ہک بہوں اوپرے جئیں جَنڑے رفعت عباس کوں سڈیا ' رفعت عباس اوندی شاعری تے علم بارے بہوں تھوڑیاں گالہیں میں جانڑدا ہم پر ہک گالھ چنگی طرحاں جانڑدا ہم جو اپنڑے ملتان دے ہوونڑ دا فائدہ اوہ ضرور چیندا ہا ' سرائیکی شاعری تے تصوف بارے اوہ چالیہ پنجاہ منٹ ترسلا نال بولیا ' شام پئی تھیندی ہئی تے دوست گالہیں توجہ نال پئے سُنڑدے ہَن : تساں جو میکوں بولنڑ ڈِتا چِر تانڑیں الوایم ایں شام وحدت الوجود دے آدر وچوں, وحدت دی اوں کُھنج / تھوڑ / کمی دی گالھ تھئی جیڑھی حاکم تے محکوم / قاتل تے مقتول کوں ہکڑو جاہ گنڈھیندی ہے ' ایہ اوہ معاہدہ ہے اوں آکھیا جیندے اوتے مقامی آدمی دے دستخط موجود کینھی ' وحدت الوجود دے میلے وچ جے تئیں ملاں حاکم قاضی موجود ہِن ایہ میلہ نی پھبدا : ایہو رسالہ وحدت والا وت پڑھوسے ایں شام قصیاں وچ تریمت دی تقدیر دی گالھ ہَلی ' ساڈیاں ساریاں داستاناں وچ تریمت بے آدر تھئی ہے موئی ہے ' اج تریمت دے قصے دا پاند وٹایا ونج سگدا ہے ' اج دے ناٹک وچ ہیر کوں رانجھے نال پرنایا ونج سگدا ہے ' سسی پنوں رل کے مکران پُج سگدے ہِن۔ رفعت عباس