ڈائری دا پنا 40

ڈائری دا پنا : 40

ایہ مِٹھی ہئی ' میڈے دھیانیں تےخابیں دے بُھل بُھلاندریاں وچوں ایہ شہر نکلدا ہا گُم تھی ویندا ہا ' میں کوئی ہک ہزار ہک شکلاں وچ مٹھی کوں اپنڑے گماناں وچ ڈِٹھا ہا ' میکوں لگدا ہا ایہ شہر رتیاں سلہاں نال بنڑیا ہوئے ' ادھ وچ کُھلیاں گلیاں ہِن تے ڈوجھے پاسے وت رتے مکان ہِن ' رتیاں سلہاں والے مکاناں اگوں نماں ہِن تے سارا ڈینہ مور نماں توں چھتاں تانڑیں اُڈدن ' وت میں ڈِٹھا ہا جو مکان گلیاں توں اُچے ہِن تے مٹھی گھریں اگوں ترے ترے چار چار پوڑیاں والا شہر ہے ' وت ہک پھیریں مٹھی کوں میں بارش وچ ڈِٹھا تے لگدا ہا ایہ ٹین دا شہر ہے ' ہک پھیریں بہوں شور ہا تے خواب وچ مٹھی دے چوک وچ لاریاں دا رش ہا ' مٹھی دے میں بہوں خاب ڈٹھے ہَن ' ڈو ترے سالیں توں خلیل کبھار دی دوستی وچ ایہ واہند سِروں ودھ گئی ہئی ' ایہ مٹھی ہئی ' اساں مٹھی دے مرکزی چوک تئیں پُج گئے ہاسے ' میں اپنڑے کیتے دوا گھدی ' مٹھی دی دستکاری وچوں گھر والیاں کیتے کڑھائی دے گلے گھدے ' پانڑی دی ہک ہک بوتل حاصل کیتی ' اپنڑے آپ کوں ڈسیا ایہ مِٹھی ہے ' اپنڑی حیرت والے سارے بٹن چالو کیتے ' ایہ مِٹھی ہے ایہ مِٹھی ہے ' میڈے تے ہک بے دھیانی طاری تھی گئی ' میں مِٹھی وچ مِٹھی توں بیگانہ تھی گیا۔